Тиит Эбэҕэ «Учуутал, эн ааккын киэн тутта ааттыыбыт» диэн Россияҕа Педагог уонна аҕа уһуйааччы сылынан «Кэскил» оҕо саадын үлэһиттэрин, П.С. Скрябин аатынан 1-кы Дьөппөн орто оскуолатын, санаторнай оскуола-интернат учууталларын чиэстиир тэрээһин буолла.
Бу күн Владислав Барамыгин, Фаина Готовцева, Петр Пестерев, Софья Прокопьева ырыанан эҕэрдэлээтилэр. «Холумтан сойботун, күһэҥэй быстыбатын» Ермолай Скрябин ахтыы кинигэтиттэн быһа тардан испэктээх туруорулунна. Оруолларга олохтоохтор оонньоотулар: Пелагея Лукинична Никифорованы — Лена Данилова, Матрена Михайлова Григорьеваны — Фаина Готовцева, Дарья Осиповна Пестереваны — Саргылана Васильева, луохтууру — Василий Михайлов, Танюша кыыһы — Элина Теплоухова, Миша уолу — Тима Адамов, Колинины — Иван Федотов итэҕэтиилээхтик көрдөрдүлэр.
1939 сыллаахха Саха сириттэн 18 бастыҥтан бастыҥ учуутал Москваҕа тиийэн Бүтүн Сойуустааҕы ыстаарыста М.И. Калинин илиититтэн уордьан, мэтээл туппуттара. Пелагея Лукинична Никифорова 30 сааһыгар Үлэ кыһыл знамятын уордьанынан наҕараадаламмыт. Ону сырдатан көрдөрбүт испэктээххэ кыттыбыт дьон бары оруолларын бэркэ оонньоотулар, дьон биһирэбилин ылыахтарын ыллылар. Бу дьоро киэһэҕэ РФ суруналыыстарын Сойууһун чилиэнэ Ермолай Скрябин ыалдьыттаата, испэктээххэ оонньообут дьоҥҥо махтанна. Тэрээһини Мария Михайлова ыытта. Бибилэтиэкэр Татьяна Сивцева кинигэ быыстапкатын туруорда.
Бу курдук биһиги бэлиэ күн дуоһуйа сынньанан, элбэҕи билэн тарҕастыбыт.
Анастасия Мордовская, Тиит Эбэ с.