Саха сирин уустарын үлэлэрэ Аан дойдуга үрдүктүк сыаналанар буолла. Искусство таһымнаах тупсаҕай оҥоһук сайдыытын өрө туппут уран тарбахтаах маастардарбыт үлэлэрин норуокка, дьоҥҥо-сэргэҕэ быыстапкалаан элбэхтик көрдөрөн, саха киһитин мындыр өйүн, сатабылын, айылҕаттан айдарыылаах талаанын Аан дойду таһымыгар ааттатта.
Өктөм нэһилиэгин олохтооҕо, дьоно-сэргэтэ киэн туттар киһитэ, Хаҥалас улууһун норуотун маастара, мас ууһа Демьян Дмитриевич Колодезников «Удьурҕай ойуута олоҥхо тойугар» диэн оҥоһуктарын быыстапката Покровскай куоракка Арчы дьиэтигэр арылынна.
Үөрүүлээх тэрээһиҥҥэ ыҥырыылаах ыалдьыттар Покровскайтан, Өктөмтөн, Томпоттон кэлэннэр эҕэрдэ тыллары эттилэр. Бу күн норуот уһанар-иистэнэр үгэстэрин сөргүтүүгэ, сайыннарыыга, үгүс сыллаах сыралаах үлэтин иһин Демьян Колодезниковка Саха Өрөспүүбүлүкэтин уус-уран оҥоһуктарга Палататын 2024 сыл сэтинньи 20 күнүнээҕи 747 №-дээх быһаарыытынан «Саха Өрөспүүбүлүкэтин уус-уран оҥоһуктарын маастара» үрдүк аат туттарылынна.
Демьян Дмитриевич 1963 сыллаахха Томпо оройуонугар Мэҥэ Алдан нэһилиэгэр Колодезниковтар дьиэ кэргэттэригэр төрөөбүтэ. 1980 сыллаахха орто оскуоланы бүтэрэн ол сыл Харбалаах училищетыгар суоппар уонна тракторист идэтин баһылыыр, онтон дойдутугар кэлэн армияҕа сулууспалыы барыар диэри тракториһынан үлэлиир. Армияттан кэлэн баран дойдутугар бастаан совхозка, онтон горно-геологическай экспедицияҕа үлэлии сылдьан аварияҕа түбэһэн 2-с группалаах инбэлиит буолар. Санаатын түһэрбэккэ олох иһин охсуһан, суорҕан-тэллэх киһитэ атаҕар туран, бэйэтин сайыннаран, туоһунан тигэргэ, маһынан уһанарга дьаныһан дьарыктанар. 1997 оҥоһуктарынан быыстапкаларга кыттар, улууһугар, өрөспүүбүлүкэҕэ буолар быыстапкалары кэрийэн маастардар оҥоһуктарын көрөн үөрэнэр.
Демьян Дмитриевич биир бастакы үлэтинэн 2010 сыллаахха кэргэнигэр хатыҥтан бэргэhэ уурары оҥорбутун ааттыыр. Онтон ыла бэстэн, тэтиҥтэн дьикти, кэрэ, тупсаҕай оҥоһуктары кыhан, араастаан быhыылаан оҥорор буолбут. Кэлин удьурҕайтан кыhан оҥорор буолбут.
2014 сылтан араас таһымнаах куонкурустарга кыттан, үлэлэрэ дьон-сэргэ сэҥээриитин ылан, бириистээх миэстэлэргэ тиксэр буолан барбыта. Сылтан сыл тиhигин быспакка үлэлэрин элбэтэн, тупсаран, билигин өрөспүүбүлүкэҕэ биир биллэр-көстөр мас ууhа буолла.
2019 сыллаахха ыытыллыбыт «Связь поколений» диэн өрөспүүбүлүкэтээҕи куонкуруска Демьян Дмитриевич ийэтинээн, кэргэнин Екатерина Иннокентьевна дьиэ кэргэнин кытары кыттыыны ылбыттара. Бу куонкуруска 2 истиэпэннээх дипломант уонна жюри биһирэбил бирииһинэн наҕараадаламмыттара.
2022 сыл түмүгүнэн өктөмнөр Демьян Колодезниковка «Сыл маастара» ааты иҥэрбиттэрэ.
Өймөкөөҥҥө буолбут Олоҥхо ыһыаҕар «Үлэнэн чэлгийэр Сахам сирэ» өрөспүүбүлүкэтээҕи уус-уран оҥоһуктар күөн күрэстэригэр «Удьурҕайынан оҥоһук» күрэҕэр 2 истиэпэннээх лауреат буолбута.
Быйылгы Амма улууһугар ыытыллыбыт Олоҥхо ыhыаҕар «Художественная резьба по дереву» күрэххэ «Бастыҥ уран оhуор» анал ааты ылбыта. Туймаада ыһыаҕар «Уран мас ураты ойуута-оhуора» көрүү быыстапкаҕа биһирэбил бириис ылбыта. 2023 сыллаахха өрөспүүбүлүкэтээҕи доруобуйаларыгар хааччахтаах дьон икки ардыгар тэриллибит «Таланты особенных людей Севера» күрэххэ Гран-при үрдүк аатын ылбыта.
Наталья Тимофеева, Арчы дьиэтин методиһа, СӨ култууратын туйгуна.