Төхтүр сэлиэнньэтигэр өрөспүүбүлүкэ инвестиционнай бырагырааматынан «Кэнчээри» оҕо саадын 90 миэстэлээх саҥа таас дьиэтин тутуу салҕанар. Эбийиэк былаан быһыытынан сыл бүтүүтэ үлэҕэ киириэхтээх. Генеральнай бэдэрээччит — «АЭБ Капитал» ХЭТ, тутууну «Восток Капитал» ХЭТ ыытар.
Уһуйаан сэбиэдиссэйэ Анна Афанасьева иһитиннэрбитинэн, билигин оҕо саадыгар 60-н тахса оҕо иитиллэр.
— Урукку дьиэбит 1968 сыллаах типовой тутуу этэ, эргэрэн, хаарбах туруктанан уонна оҕобут да ахсаана сылтан сыл эбиллэр буолан, улахан оҕо саадын тутуутун туруорсаммыт, 2022 сыл күһүнүгэр таас дьиэ бастакы сыбаайата түспүтэ. Билигин эбийиэк иккис этээһин дьэндэтэн таһаарбыттарын көрөн, саҥа, киэҥ-куоҥ дьиэлэнэрбит чугаһаан иһэриттэн үөрэбит. Иккис сылын А.Д. Широких аатынан орто оскуола начаалынай кылаастарыгар анаммыт аҥарыгар үлэлии олоробут. Биллэн турар, табыгаһа суох, кыараҕас даҕаны, күн бүгүн 23 үлэһиттээхпин. Саҥа уһуйаан дьиэтэ 1 406,52 кв. м иэннээх, алта бөлөххө анаммыт хостордоох, спортивнай, музыкальнай саалалаах, пищеблоктаах, аныгылыы хааччыллыбыт буолара былааннанар. Тиэргэнигэр оҕо былаһааккалара туруохтара. Онон, кэнчээри ычаппыт үүнэригэр-сайдарыгар бары усулуобуйа тэриллиэ диэн бигэ эрэллээхпит, — диэн кэпсээтэ Анна Егоровна.
Ольга Гермогенова.