Спорт сонуна
Олунньу 20-22 күннэригэр Хабаровскай куоракка, Уһук Илиҥҥи Федеральнай уокурукка 15 саастарыгар диэри оҕолорго, дзюдоҕа бастыыр иһин күрэхтэһии буолан ааста. Хабаровскай, Приморскай, Забайкальскай, Камчатскай кыраайдартан, Сахалин, Магадан, Амур уобаластарыттан уонна Бурятияттан, Саха сириттэн барыта 300 спортсмен кыттыыны ылла.
Бу күрэхтэһиигэ Покровскайтан, Олимпийскай эрэл күөн көрсүү оҕо спортивнай оскуолатын дзюдоистара кытыннылар. Биһиги улууспутугар 2012 сыллаахха Монголияттан анал ыҥырыынан кэлбит испэсэлиис, Монголия спордун норуоттар икки ардыларынааҕы кылаастаах маастара, дзюдоҕа тириэньэринэн үлэлиир Шагдар Гансух кылгастык бу курдук иһитиннэрдэ:
— Бастакытын өрөспүүбүлүкэ тас өттүгэр күрэхтэһэ барбыт спортсменнарбыт бары үчүгэй эрэ өттүнэн бэйэлэрин көрдөрдүлэр. Ол да буоллар, күрэхтэһии кэмигэр күүппүппүт курдук, сыыһа-халты да хамсаныылар бааллара, ону биһиги салгыы эрчиллии, дьарык кэмигэр көннөрүөхпүт. Федеральнай уокурук таһымыгар бастакы сырыы биһиэхэ улахан күрэхтэһиигэ үөрүйэҕи уонна салгыы оҕолорбут рейтиннэрин үрдэтэр бааллары хомуйалларыгар кыах биэрдэ. Россия күрэхтэһиитигэр кыттар быраабы ыларга рейтинг хомуйарбыт хайаан да наада. Хас биирдии эдэр спортсмеммыт путевканы ылыы иһин киирсиигэ, бэйэлэрин очукуоларын номнуо хомуйдулар, — диэтэ тириэньэрэ.
Чочуллубут албастардаах, кимэн киириилэрдээх сытыы-сылбырҕа киирсиилэрдээх күрэхтэһиигэ биһиги спортсменнарбыт наһаа хаалсыбакка утары тахсан, бырахсан испиттэр. Ол курдук, 55 кг ыйааһыҥҥа Кирилл Захаров 5-тэ тустан үһүс миэстэ буолбут, боруонса мэтээли түөһүгэр кэппит. Оттон 73 кг үөһэ Рамиль Галибаров 5 миэстэҕэ тахсары ситиспит. Оҕолор Покровскай куорат 3-с №-дээх орто оскуолатыгар үөрэнэллэр.
Санатар буоллахха, дзюдо диэн илиҥҥи омуктар күөн көрсүүлэрин, кимэн киириилэрин көрүҥүн албастараКытайтан Японияҕа көһүүлэриттэн, джиу-джитсу көрүҥэр олоҕуран төрүттэммитэ биллэр. Дзюдоны төрүттээччинэн Япония уһулуччу педагога, сырдатааччыта уонна тириэнньэрэ Кано буолар. Аныгы дзюдо, билиниллибит лиидэрдэринэн Япония дзюдоистара буолаллар.
Уйбаан УЙГУУРАП,
хаартыска уонна видео, тириэньэр Шагдар Гансух тус архыыбыттан туһанылынна.