Манна саахымат, дуобат «Тобул» кулууба «Саҥа Дьыл бэлэҕэ» диэн бырааһынньыктааҕы күрэҕи тэрийэн ыытта. Бу туһунан сонунун биһиги общественнай кэрэспэдьиэммит Лариса Леверьева иһитиннэрдэ:
— «Тобул» кулууп тэриллибитэ сүүрбэттэн тахса сыл буолла. Элбэх күрэхтэһиини ити кэм устата тэрийэн ыытта. Бу кулуубу оскуолабыт учууталлара тэрийбиттэрэ күн бүгүнүгэр дылы үлэлии турар.Умнубаппыт 2019 сыллаахха кулууппут 20 сыллаах үбүлүөйүгэр тэрийээччилэрбит Н.С.Семенов, Ф.И.Лебедев, В.И.Лукин, П.Н.Лебедев кэлэн ыалдьыттаабыттарын. Онтон быйылгы көрсүһүүбүтүгэр Феликс Лебедев оҕолоро саахымат чаһытын бэлэх ыыппыттарын балтылара Антонина Николаева кэлэн эҕэрдэ тылларын этэн туттарда. Үөрдүбүт, махтанныбыт.
Бу күн саахымакка, дуобакка түөртүү остуолга хатыһыылаах күрэх буолла. Ол түмүгэр дуобакка кыргыттарга Владилена Филиппова бастаата, Айыына Спиридонова иккис, Мира Слепцова үһүс буоллулар. Дьахталларга туһааннааҕынан Любовь, Евгения, Лена Захаровалар үс миэстэни ыллылар. Уолаттарга Максим Соловьев, Мичил Владимиров, Эрсан Сакердонов миэстэлэстилэр, эр дьоҥҥо — Д.Д.Захаров, А.Р.Латышев, М.Д.Захаров бэркэ оонньоотулар.
Саахымакка кыргыттарга эмиэ Владилена Филиппова, Айыына Спиридонова, Мира Слепцова, уолаттарга Айан Созонов, Мичил Владимиров, Вова Амонов, эр дьоҥҥо Евгений Прокопьев, Николай Андреев, Д.Д.Захаров бириистэннилэр. Күрэхтэһиигэ элбэх оҕо, дьиэ кэргэн кыттыбыта астыннарда, «Тобул» кулууп үлэтэ кэскиллээх эбит диэн эрэлбит улаатта.
Маны сэргэ хабылыкка, хаамыскаҕа күрэхтэһии буолла. Кыайыылаахтар бириистэри туттулар. Тэрээһиҥҥэ Москваттан кэлэ сылдьар ыалдьыттар кыттан күрэхтэргэ холонон көрбүттэрэ үөртэ, сөхтөрдө, — диэтэ кулууп энтузиаһа уонна элбэх хаартысканы ыытта.
Людмила Аммосова, «Хаҥалас» хаһыат