Кыайыы 80 үбүлүөйдээх сылын чиэстээн Өктөм нэһилиэгэр СӨ Бастакы президенэ М.Е. Николаев аатынан Үөрэх-билим киинин уораҕайыгар икки оскуола үөрэнээччилэрэ, АСАТУ Өктөмнөөҕү салаатын устудьуоннара, бэтэрээннэр, “Дьиэрэй” бэтэрээннэр хордара мустан үөрүүлээх быһыыга-майгыга Кыайыы Знамятын көрүстүлэр.
Нэһилиэк баһылыга Александр Большаков Кыайыы Знамятын өрө тутан тыл эттэ.
РФ уопсай үөрэхтээһинин бочуоттаах бэтэрээнэ, СӨ үөрэҕириитин туйгуна, Хаҥалас улууһун уонна Өктөм нэһилиэгин бочуоттаах олохтооҕо, П. И. Шадрин аат. Өктөм орто оскуолатын байыаннай үөрэх учууталынан 46 сыл эҥкилэ суох үлэлээбит, Сэбиэскэй Аармыйа офицера Сергей Николаевич Андреев Улуу Кыайыы Знамятын көрсүүнү салайан ыытта уонна биир дойдулаахтарын, эдэр көлүөнэ ыччаты истиҥник эҕэрдэлээтэ. 70 киһилээх «Дьиэрэй» бэтэрээннэр, учууталлар уонна оҕолор хуордара (салайааччы Протопопова И.) ньиргиччи ыллаан дьону астыннарда. Өктөмнөөҕү норуот тыйаатырын артыыстара (режиссер Аржакова З.) Елизавета Рожина-Ил Ииһэ «Күн көрүө, от үүнүө» музыкальнай инсценировкатын көрдөрөн дьон биһирэбилин ыллылар.
Кыайыы Знамятын көрсөн нэһилиэк дьоно-сэргэтэ, оҕолоро, устудьуоннара олус астыннылар, улуу Россияны кытта биир тыыннанан олорорбутунан киэн тутуннулар.
Федора Фомина, Өктөм с.