Баһылыктар сүбэ-мунньахтарыгар
Нэдиэлэ саҕаланыыта ыытыллыбыт муниципальнай тэриллиилэр баһылыктарын сүбэ-мунньаҕар икки сүрүн боппуруос көрүлүннэ.
Биллэрин курдук, 2029 сылга улууспутугар ХХIII Манчаары оонньуулара ыытыллыа. Бу улахан тэрээһини үрдүк таһымҥа ыытар туһугар үлэ былаана билиҥҥиттэн торумнаныан наада. Улуус баһылыгын социальнай боппуруоска солбуйааччыта Юрий Никифоров Манчаары оонньууларыгар бэлэмнэнии туһунан иһитиннэриилээх кытынна. Кини соторутааҕыта улууспут дэлэгээссийэтэ Тааттаҕа баран уопут үллэстэн, бэлэмнэнии үлэни билсэн кэлбитин кэпсээтэ. Чуолаан, спортивнай эбийиэктэр тутууларын, кэлбит спортсменнары, көрөөччүлэри олохтооһун хайдах тэриллэрин көрбүттэр. Юрий Юрьевич бэлиэтээбитинэн, биһиги улууспутугар бэрт сотору Оонньуулары тэрийэр хамыыһыйа састааба, анал Дирекция бигэргэниэ.
— Улуус киинигэр Покровскайга икки спортивнай эбийиэк тутуллара былааннанар. Бу – элбэх функциялаах спортивнай комплекс уонна стадион. Эбийиэктэр тутуулара өрөспүүбүлүкэ бүддьүөтүттэн үбүлэниэҕэ. Билигин эбийиэктэр турар сирдэрин быһаарыы үлэтэ барар. Манчаары оонньуулара 11 спорт көрүҥүнэн ыытыллыа. Онуоха күрэхтэһиилэр тэриллэн ыытыллар сирдэринэн Покровскайы таһынан чугастыы Нөмүгүнү уонна Өктөмү былаанныыбыт, — диэтэ баһылык солбуйааччыта. – Спартакиадаҕа быһа холоон 10-15 тыһ. киһи (онтон кыттааччыта 6 тыһ киһи) кэлиэ, кинилэри олохтооһуҥҥа үөрэх тэрилтэлэрэ үлэлэһиэхтэрэ. Онон таарыйа оскуолалары, уһуйааннары өрөмүөннээн бэлэмниэхпитин наада. Уопсайынан, улуус бары тэрилтэлэрэ – доруобуйа харыстабыла, үөрэҕирии, хомунаалынай хаһаайыстыбаҕа тиийэ тэрийэр хамыыһыйа састаабыгар киирсэн бииргэ үлэлэһэллэрэ ирдэнэр. Өссө биир улахан болҕомто ууруллар боппуруоһунан спортсменнары, кыттыылаахтары, ыалдьыттары аһатыы буолар, — диэн Юрий Никифоров тоһоҕолоон бэлиэтээтэ.
Биллэн турар, баһылыктар спартакиада иитинэн бэйэлэрин нэһилиэктэригэр биир эмит эбийиэги туттаран ылар баҕалаахтар. Хачыкаат нэһилиэгин баһылыга Ирина Оболкина бу улахан тэрээһини көрсө улуус киинин тупсаран оҥоруу, суолу-ииһи өрөмүөннээһин, уоту-күөһү бэлэмнээһин уо.д.а. үлэни тэрийии быдан суолталаах уонна барыстаах буолуо диэн санаатын эппитин үгүстэр өйөөтүлэр.
— Ыалдьыттары көрсүү, аралдьатыы, култуурунай бырагырааманы тэрийии эмиэ улахан эппиэтинэһи эрэйэр. Онуоха эрдэттэн улууспут бэйэ оҥорон таһаарааччыларын, урбаанньыттарын түмэн кыттыһыннарар, атыы-эргиэн миэстэлэрин тэрийэр, туристическай эбийиэктэринэн күүлэйдэтэргэ табыгастаах маршрут оҥорор, илдьэр-аҕалар тырааныспарынан хааччыйар соруктары биир сүбэнэн туруорунуохха, — диэн уопуттаах салайааччы Ирина Викторовна кэллиэгэлэрин ыҥырда. Онуоха Юрий Никифоров соторутааҕыта өрөспүүбүлүкэ кылаабынай архитектора Любовь Папок кэлэ сылдьан улуус үлэтин сүрүн хайысхатыгар – туризмы сайыннарыыга (Сиинэҕэ диэри) бэйэҕит этиигитин эмиэ киллэриҥ диэбитин эбэн эттэ. Чахчы, от ыйын саҕаланыыта от-мас үлэтин иннинэ чугас сытар улууска кэлэн күүлэйдиэн, Хаҥалас кэрэ-бэлиэ сирдэрин көрүөн баҕалаах ахсаана биллэ улаатыа. Олору көрсөргө үрдүк бэлэмнээх олоруохпутун наада.
Ольга Гермогенова.