Спорт сонуна
Тумул нэһилиэгэр «Вызов Мальжагарского куста» мас тардыһыытыгар күрэхтэһии буолан ааста. Күрэхтэһии тэрийээччитинэн Тумул оскуолатын дириэктэрэ Николай Гаврильев уонна физкультура учуутала Мария Гаврильева буолаллар. Дьүүллүүр сүбэҕэ Роман Протодьяконов, улуустааҕы спорт управлениетын салайааччытын солбуйааччы уонна күрэхтэһии бочуоттаах ыалдьыттара Иннокентий Корякин, биир дойдулаахпыт Гаврил Дмитриев үлэлээтилэр.
Булгунньахтаах, Улахан Аан, Чкалов, Тумул, Үөдэй уонна Иһит оскуолаларыттан барыта 58 спортсмен оҕолор кэлэн кытыннылар. Иһит хамаандаата элбэх оҕону аҕалбыта үөртэ. Күрэхтэһиини Марфа Соловьева уонна Ньургун Уваров, мас тардыһыыга Аан дойдутааҕы чемпион судьуйалаатылар. Күрэхтэһии куйаар ситимигэр быһа биэриинэн көһүннэ, онон ыраахтан-чугастан спортсмен оҕолорбут төрөппүттэрэ, аймахтара көрдүлэр, комментатор Роман Протодьяконов сэргэхтик ыыппытын бэлиэтиибит.
Күрэхтэһиини тэрийиигэ Сандра Матвеева дириэктэрдээх Тумуллааҕы култуура уонна спорт киинин үлэһиттэрэ күүс-көмө буоллулар.
Тумултан кыттыбыт оҕолор ситиһиилэринэн төрөппүттэрин уонна биир дойдулаахтарын үөртүлэр. Ол курдук, кыргыттарга 45 кг Иванова Фаина 2 миэстэ, 50 кг Яковлева Эйнара 3 миэстэ, 60 кг Гаврильева Милена 2 миэстэ буоллулар. Уолаттарга 25 кг Максимов Егор бастаата, 30 кг Строев Денис кыайыылаах, Васильев Дима 3 миэстэ буолла, 35 кг Макаров Денис, 50 кг Охлопков Эрэл бастаатылар. Оҕолорбутугар инникитин үрдүктэн үрдүк ситиһиини баҕарабын!
Лидия Христофорова, Тумул с.