Бэлиэ түгэн
Бу хаартыска хаҥаластарга бэлиэ түгэни кэпсиир. Покровскайга Албан Аат булгунньаҕа 1975 сыллаахха арыллыбыта. Урут манна Серго Орджоникидзе бюстээх пааматынньык турбута (билигин Покровскайдааҕы 1 № оскуола аттыгар турар). Албан Аат булгунньаҕар Дьокуускайтан Умнуллубат уокка Марат болуоссатыгар тутуллубут комплекстан уот саҕа барбыппыт – Покровскайтан Чесноков Константин Константинович, Аҕа дойду Улуу сэриитин 1 истиэпэннээх уордьаннаах, Будапеһы, Белграды фашистартан босхолооһун, Германияны Кыайыы иһин, ону сэргэ үбүлүөйүнэй мэтээллэрдээх буойун, биир пионер кыысчаан (аатын өйдөөбөппүн, бука, ким билэр, суруйдаргыт, Покровскай оҕото этэ) кэриэстэбил уоту аҕалар чиэскэ тиксибиттэрэ. Оччотооҕу партия оройуоннааҕы кэмитиэтин «Волга» массыынатынан сылдьыбыппыт. Көрөргүт курдук, уоту ылыы сиэрин-туомун ылыыны бочуот карауллаах дьокуускайдар тэрийбиттэрэ.
Санатар буоллахха, Албан Аат булгунньаҕын хас да сыл саҥардан оҥорбуттара. Улуу Кыайыы 75 сылын көрсө 2007 сылтан Покровскай куораты салайан олорбут Николай Весвало этэринэн, 2010 сыллаахха гаас турбата тардыллан «Умуллубат уоппут» умуллубат буолбута. Оччолорго даҕаны куолуһут үгүс этэ – уоту уматан харчы халлааҥҥа көтөр диэн. Дьэ ону куораппыт салалтатын буҕаалтыра Ирина Белькова сорунан туран аахсан кыра тарыыбы быһаарсан Уоппут билигин умуллубат.
Бу иннинэ баллону туһанан бырааһынньыктарга уматыллар этин олохтоохтор өйдүүллэр. Мемориальнай комплекс оҥоһуллуутун историятын ким үчүгэйдик билэр, суруйуҥ. Өссө сэбиэскэй олохпут оҥкула уларыйыан иннинэ бу ытык сири оҥорууга улахан кылаатын киллэрбит киһинэн оройуоннааҕы Сэбиэккэ бэрэссэдээтэли тутуу боппуруостарыгар солбуйааччы биллиилээх инженер Анатолий Лукин элбэхтик сүүрбүтүн-көппүтүн уруккуну син билэр бэтэрээннэр кэпсээн аһарбыттара. Ким өссө тугу билэрий?
Людмила Аммосова, ааптар хаартыскаҕа түһэриитэ.