Улууспут олохтоохторо байыаннай дьайыы саҕаланыаҕыттан биир дойдулаахтарыгар араас көмөнү оҥороллор. Ону сэргэ бары тэрилтэлэр, биирдиилэн дьон харчынан көмөнү тиһигин быспакка оҥоро олороллор. Анал байыаннай дьайыы кыттыылаахтарын дьиэ кэргэттэригэр өйөбүл, көмө эмиэ ситимнээхтик тэриллэр – мас-муус тиэйии, атын да дьиэҕэ-уокка сыһыаннаах боппуруос кэмигэр быһаарыллан иһэр.
Сыл устата бары нэһилиэктэргэ туох-ханнык көмө ыытыллыбытын хаһыаппытыгар, социальнай ситимнэрбитигэр утумнаахтык сырдаттыбыт. Хаҥалас улууһун биир да муниципальнай тэриллиитэ уопсай көмөттөн туора турбата. Ол курдук, быһа холоон эттэххэ, нэһилиэк аайы харыстанар сиэккэни өрөр «шелкопрядтар», илиилэрин сылааһын иҥэрэн угунньуктан саҕалаан халыҥ курткаҕа тиийэ тигэр иистэнньэҥнэр бааллар. Ас-үөл астаан, хомуйан баһыылкалаан ыытар амарах сүрэхтээх далбар хотуттар, бэл, түргэнник буһар миини оҥорон таһаарар буоллулар.
Улууспут баһылыга Олег Иринеев соторутааҕыта байыннай дьайыыга кыттарга быһаарыныы ылынан сулууспаҕа барда. Кини салалтатынан улуус дэлэгээссийэтэ 2022 сылтан саҕалаан хаста даҕаны байыаннай дьайыыыытыллар сиригэр тиийэн биир дойдулаахтарбытыгар гуманитарнай көмөнү тиксэрдилэр.
2022 сыллаахха Бурятия, Приморскай уонна Хабаровскай кыраайдарыгар мобилизацияламмыт биир дойдулаахтарга экипировка тиксэрбиттэрэ.
2023 сыл ахсынньытыгар дэлэгээссийэ байыаннай дьайыы ыытылларсиригэр 2 туонна таһаҕаһы тиксэрбитэ.
Быйыл муус устарга хаҥаластар Запорожскай уобалас, Донецкай, Луганскай норуодунай өрөспүүбүлүкэлэр эҥэр сулууспалааччыларга аадырыстаах баһыылкалары таһынан байыастарга наадалаах тэриллэри — тепловизионнай монокулярдары, прицеллары, коллиматорнай прицеллары, түүнүн көрөр прибордары уонна 2 мотоцикл, массыына, квадрокоптердары, антидроновай саалары уо.д.а. илдьэн биэрбиттэрэ.
Улуус баһылыгын солбуйааччыта Юрий Никифоров салайааччылаах дэлэгээссийэ бу күннэргэ эмиэ байыастары көрсөн гуманитарнай көмөнү тиксэрэ сылдьаллар.
Икки сыл кэриҥэ улуус таһымнаах амарах санаа кэнсиэртэрэ, аахсыйалар тэриллэн ыытыллаллар. 2022 сыл сэтинньитигэр хомуурга ыҥырыллыбыт уолаттарга өйөбүл суотугар биирдиилээн дьонтон 217,300 тыһ. солк, урбаанньыттартан 152 тыһ. солк киирбитэ.
2023 сыл муус устарыгар Дьокуускайга Хаҥалас улууһун күннэрин чэрчитинэн тэриллибит кэнсиэргэ 264 тыһ. солк киирбитэ. Бу үп байыаннай эпэрээссийэни өйүүр Пуондаҕа ыытыллыбыта.
2024 сэтинньигэ Покровскайга ыытыллыбыт амарах санаа кэнсиэрин чэрчитинэн ыытыллыбыт аахсыйа кэмигэр 3 647 512,91 солк. үп кииртэ. Санатан эттэххэ, маннык тэрээһиннэр улууспут бары нэһилиэктэригэр ыытыллыбыттара, онно 30-70 тыһ. солк үп киирбитэ биллэр.
Анал байыаннай дьайыы кыттыылаахтарын өйүүр Хаҥалас улууһун пуондатыгар 2022 сылга 3 736 210 солк. 2023 сылга — 9 550 777 солк., 2024 сылга — 4 294 824 солк. киирбитэ.
Дойдубут инникитин туһугар көмө салҕанар.
Ольга ГЕРМОГЕНОВА.