#Норуот маастарын күнүн көрсө
Норуот маастарын күнүн уонна Аан дойдутааҕы дьахталлар күннэрин көрсө бүгүн Киин бибилэтиэкэ «Иһирэх түмсүү» көстүүнэйигэр СӨ уус-уран оҥоһуктарын маастара, Хаҥалас улууһун норуотун маастара Чия Спиридоновна уонна СӨ норуотун маастара Ньургун Петрович-Барылан Уус Александровтар дьиэ кэргэни кытта истиҥ-иһирэх көрсүһүүнү Валентина Колесова иилээн ыытта.
Тарбахтарыгар талба талааннаах дьиэ кэргэн хаһан-туохтан иискэ-ууска ылсыбыттарын, урбаан эйгэтигэр хайдах сыстыбыттарын, сыралаах үлэлэрин, инники былааннарын туһунан билиһиннэрдилэр. Ону сэргэ быыстапкалыыр пуондаларыттан — үрүҥ, кыһыл көмүстэн, сэлии муоһуттан, туостан араас кэрэ, киһи эрэ сөҕүөх мандар ойуулаах-оһуордаах уран оҥоһуктарын, сувенирдарын дьон биһирэбилигэр туруордулар.
Талааннаах киһи эргиччи дьоҕурдаах буолар дииллэрин туоһулаан бу күн Ньургун Петрович бэйэтэ куппут хомуһугар оонньоон, нууччалыы, сахалыы ырыалары доллоһута ыллаан көрөөччүлэрин сөхтөрдө, манньытта.
Чия Спиридоновна уопуттаах урбаанньыт быһыытынан бибилэтиэкэ иһинэн үлэлиир «Бисерная мозаика» түмсүү кыттыылаахтарыгар илиинэн оҥоһугу сыаналааһыҥҥа, бэйэ оҥоһугун эргиниигэ, батарыыга тэттик сүбэ-ама биэрдэ.
Уус ыал туһунан сиһилии хаһыаппыт кэлэр нүөмэригэр ааҕаарыҥ.
Видео: https://t.me/gazetahangalas/35598
Ольга Гермогенова.