2-с Малдьаҕар нэһилиэгэр Аҕам саастаах дьоммутугар ураты суолтаны уурабыт. Ол курдук хас сылын аайы «Аан Аартык» Култуура киинин үлэһиттэрэ алтынньыга Аҕам саастаахтар декадаларын ыытабыт. Быйыл эмиэ араас маастар-кылаастар буоллулар: Татьяна Пудова кыл сэлээппэ өрөргө, кылы бэлэмнээһиҥҥэ, Светлана Васильева иистэнэр массыынанан оҕуруо тигэргэ, Варвара Кононова күрүчүөгүнэн атах таҥаһын баайарга үөрэттилэр. Бу маастар-кылаастарга сылдьбыт дьоммут элбэххэ үөрэннилэр.
Кырдьаҕастарбытыгар анаан «Кыталыктаах кырдалым» уус-уран, «Учуутал» документальнай киинэлэри көрдөрдүбүт. Түмүккэ «Эдэр саас эргийбэт эриэккэс күннэрэ элэҥнээн аастаҕа түргэнин…» диэн бырааһынньыктааҕы сынньалаҥ киэһэтэ буолла. Олохтоох дьаһалта, «Кыымчаан» уһуйаан, баһаарынай чаас салайааччылара кэлэн үбүлүөйдээх бэтэрээннэргэ эҕэрдэ, махтал суруктары, сэмэй бэлэхтэри туттардылар, музыкальнай эҕэрдэлэрин тиэртилэр. Итии үүттээх чэйдээх, минньигэс астаах остуол тула олорон ирэ-хоро кэпсэтэн, ыллаан-туойан, оонньоон-үҥкүүлээн астынан тарҕастылар.
Биһиги ытыктыыр, убаастыыр аҕам саастаах дьоммут! Сааһырары сыҕарытан, кырдьары киэр кыйдаан, сүүс сааскытыгар дылы сүһүөххүт үрдүгэр сүүрэ сылдьыҥ!
Римма Черемкина, С.А. Григорьев аат. «Аан Аартык» Култуура киинин испэсэлииһэ. Улахан Аан с.