АГАТУ Өктөмнөөҕү филиалыгар быйыл барыта 466 устудьуон үөрэнэр. Манна оҕолор араас хайысханан уһуйуллаллар, чинчийии өттүгэр үгүс үлэ ыытыллар.
Бу күннэргэ математикаҕа, историяҕа, английскай тылга олимпиада ыытылынна. Манна 2-с куурус устудьуоннара кыайдылар: «Агроинженерия» идэҕэ үөрэнэр Виктория Мухоплева бастаата, II-с миэстэҕэ «Земельно-имущественные отношения» идэ устудьуона Оксана Федорова таҕыста уонна III-с миэстэ «Агроинженерия» устудьуона Валентин Скрябин буолла.
История олимпиадата «онлайн» ыытылынна, темата Ленинград куорат босхолооһун 80 сылыгар ананна. Ыччаттар манна дойдубут историятын бигэ-чиҥ билиилэрин көрдөрдүлэр. «Землеустройство» салаатын 1-кы кууруһун устудьуона Ариан Охлопков кыайыылаах буолла, «Земельно-имущественные отношения» идэҕэ 2 кууруска үөрэнэр Светлана Петрова II-с уонна III миэстэ Виктория Мухоплева («Агроинженерия») буоллулар.
Английскай тыл олимпиадатыгар үрдүк таһымнаах билиилэрин Игорь Прокопьев, Ариан Охлопков уонна Светлана Петрова көрдөрдүлэр.
Устудьуоннарга аналлаах үөрэтэр-чинчийэр үлэлэргэ конференция ыытылынна. Дьүүллүүр сүбэ уопсайа 19 араас темалаах үлэлэри иһиттэ. Диана Скрябина, Светлана Петрова, Анастасия Климовская, Игорь Прокопьев,Дмитрий Васильев, Ариан Охлопков, Федор Степанов үлэлэрэ улахан интэриэһи ыллылар. Онтон анал ааттары: «Кэскиллээх үлэ» анал ааты Нарыйана Григорьева тутта, «Практическай суолталаах үлэнэн» Дмитрий Васильев үлэтэ ааттанна, «Дириҥ хорутуулаах үлэлээх» Светлана Петрова буолла.
«Великие открытия человечества» диэн билии-көрүү оонньуутугар Агро-23, Зем-23, А-23, АИ-23, Агро-22, Зио-22, АИ-22, А-21, АИ-21 бөлөхтөр устудьуоннара кытыннылар. Оонньуу хас да түһүмэххэ арахсан ыытылынна. Ыйытыктар, сорудахтар историяҕа билим эйгэтигэр биллиилээх дьон, кинилэр үлэлэригэр сыһыаннаах буоллулар. Ыччаттар хамаанданан үлэҕэбэлэмнэрин, түмсүүлээхтэрин көрдөрдүлэр. Оонньуу түмүгэр Зем-23/2 бөлөх кыайда, II миэстэ – Зем-23/1 бөлөх, III миэстэ – АИ-21 бөлөх.
Бэлиэтээн этэр буоллахха, маннык тэрээһиннэр Өктөмнөөҕү филиалга хас күн аайы ыытыллаллар. Тэрээһиннэр тустарынан социальнай ситимнэригэр таһааран иһэллэр. Онон устудьоннар олохторун туһунан кинилэр чугас дьонноро, манна үөрэниэн баҕалаахтар, урукку выпускниктар билэ-көрө олороллор. Быйылгы үөрэх дьыла, үбүлүөйүнэн сибээстээн, хаһааҥҥытааҕар да көхтөөх буолара былааннанар. Устудьоннарга үрдүк ситиһиилэри, баҕалаах идэлэринэн үтүө үлэһит дьон буолалларыгар баҕарыаҕыҥ.
Татьяна Владимирова.