Василий Андреев: «Манчаары оонньууларын» көрсө хабааннаах үлэ ыытыллыаҕа»

Улуус баһылыгын отчуота

Дьэр нэһилиэгэр Хаҥалас улууһун дьаһалтатын 2024 сыллааҕы үлэтин отчуоттуур бөлөххө баһылык Егор Исаков үлэ-хамнас, олох-дьаһах туһунан билиһиннэрдэ.

Мунньах кэмигэр нэһилиэнньэ көҥүлэ суох сыбаалкалары суох оҥоруу, улууска сүөһүнү астыыр сыаҕы арыйыы, үүт тутар анал пуун сылы быһа үлэлиирин туруорустулар, ону сэргэ эргэ мас тутуулары, хотоннору көтүрэргэ, общественнай транспорт сырыытын элбэтэргэ уо.д.а. этиилэр киирдилэр. Сэлиэнньэ кэҥээн иһэринэн сибээстээн сүөһүлээх дьон тыраассаҕа массыыналар сырыыларын бытаардар бэлиэ турар сирин уһатарга көрдөстүлэр уонна хас да сыл устата «салгыҥҥа ыйанан» турар саҥа оскуола тутуутун кыһалҕата өссө да тоҕоостооҕун санаттылар. Маны таһынан нэһилиэккэ уот ситимэ мөлтөҕүн, кыһыннары-сайыннары тыал түстэ да уот арахсан баран холбоноругар уустуктардааҕын, сүөһүлээх дьоҥҥо ыарахаттары үөскэтэрин этиннилэр.

Улуус баһылыгын э.т. Василий Андреев туох-баар санаалары, этиилэри иһиттэ уонна инникитин нэһилиэк дьаһалтатын кытта ыкса үлэлэһэрин эттэ.

Киирбит боппуруостар бары боротокуол быһыытынан быһаарыллан иһиэхтэрэ. 2029 сылга «Манчаары оонньуулара» спорт национальнай көрүҥнэрин XXIII Спартакиадата Хаҥалас улууһугар ыытылларынан сибээстээн, чуолаан, Эркээни нэһилиэктэригэр хабааннаах үлэ ыытыллаары турар. Онон улууспутугар саҥа тутуулары эрэнэ күүтэбит, — диэн Василий Емельянович тоһоҕолоото.

Татьяна Владимирова.