Тыа сиригэр эдэр дьон үрүҥ илгэни, эмис эти дэлэтэ олохсуйа тахсаллара хайҕаллаах суол. Үс оҕолоох Луиза уонна Василий Матвеевтар быйаҥ дойдутугар, Хоточчуга, Дьокуускай куораттан көһөн кэлбиттэрэ бэһис сыллара буолла.
Быйыл хотонноругар электричество уота киирэн сэргэхтик үлэлээн тигинэтэ сылдьаллар. Василий Матвеев 30 саастаах эдэр киһи, билигин аҕата Дмитрийдиин, кэргэнэ Луизалыын уонна биир үлэһиттэрин кытта улахан хаһаайыстыбаны көрөллөр-истэллэр. Быйылгы кыстыкка уопсайа 129 төбө сүөһүлээхтэр, ол иһигэр 60 ыанар ынахтаахтар. Хотон иһигэр, киирээти кытта хаҥас өттүгэр, сибиинньэлэр, уҥа өттүгэр кууруссалар бааллар, сааскы булт сезонун кэтэһэ кустар кыстаан олороллор.
Былырыын саас, аҕатынаан 6 мөлүйүөннээх «Дьиэ кэргэн пиэрмэтэ» граҥҥа кыттан кыайаннар наадалаах тиэхиньикэлэрин барытын булуммуттар. Ол курдук, МТЗ-82 тыраахтар, УАЗ-фермер массыына, итини сэргэ от оҕустарар ротор, оту мустарар, рулоннуур тиэхиньикэлэринэн толору хааччыммыттар. «Үлэлиэххэ эрэ наада”, — диир Василий.
Кэргэнэ Луиза оҕолорун көрөн олорор, минньигэс тортары сакааска астыыр. Иистэнэр массыынатынан оҕолоругар, кэргэнигэр таҥастарын тигэр. Эдэр ыаллар, Тыа хаһаайыстыбатын министиэристибэтин бырагырааматынан дьиэ туттан көҥдөйүн туруорбуттар, быйыл ситэрэр былааннаахтар, онон олохтоохтук оҥостубуттар. Олох сибэккилэрэ игирэ кыргыттар 3 саастаахтар, кыралара 7 ыйдаах уол олорор-турар киһичээн, сотору хаамыа.
Тыа сиригэр олоҕу кытта тэҥҥэ хардыылыыр, үлэни эрэ өрө тутар эдэр дьон элбии турдун.
Уйбаан УЙГУУРАП.