«Саргы түһүлгэтигэр» худуоһунньук Владимир Аммосов быыстапкатыгар сырыттым. Кини туһунан тэрээһин ыытааччыттан истибитин кэпсиир буоллахха, Владимир Кимович Аммосов 1958 с. 1-Малдьаҕарга төрөөбүт, билигин Хачыкаакка олорор.
Сэбиэскэй Аармыйаҕа сулууспалаабыт Тыа хаһаайыстыбатын техникумугар үөрэнэн агроном идэтин баһылаан Уус Алдан оройуонугар үлэлээбит. 1991 с. Хаҥалас улууһун Хачыкаатыгар учууталынан, спортка инструкторынан, эмиэ да сир үлэтигэр исписэлиис быһыытынан үлэлээн пиэнсийэҕэ тахсыбыт.
Владимир оҕо эрдэҕиттэн уруһуйдуурун, маһынан уһанарын сөбүлүүр эбит. Оскуолаттан ылата ситиһиилээхтик быыстапкаларга кыттан кэлбит. Ол быыһыгар спордунан дьаныардаахтык дьарыктанан хапсаҕайга, көҥүл тус-тууга спорт маастара. Өссө эбии тустуу көбүөрүгэр үчүгэй, чиэһинэй суудьу-йаннан биллибитэ. Аны билигин бүтүн Сахатын сиригэр норуот маастара аатын сүгэр. Кини оҥоһууларын, уруһуйдарын ааҕан сиппэккин. Ол курдук, холобурдаан эттэххэ, Владимир Кимович оҥоһуктара бэлэх быһыытынан Монголияҕа эдэр ыччаттар бэрэстэбиитэллэригэр (АХШ) этнографияҕа исписэлииһигэр Мальджари Бальзер диэн киһиэхэ о.д.а. тиксибиттэрэ курдук.
Бу быыстапкаҕа турар уруһуйдары-оҥоһуктары көрөн олус диэн сөхтүм. Эчи, элбэҕэ да бэрт, барыта уурбут-туппут курдук ыраас үлэлэр. Холобур, Хачыкаат баайа Барааскап биллэр улуу киһибитин А.Е. Кулаковскайы кытары кэпсэтэ олороро, Хачыкаат улуу бухатыыра Биэстээх-Бочоох сүдү улахан тааһы көтөҕөн турара, оннооҕор куттаммакка-толлубакка бастакы Президеммит Михаил Николаев мэтириэтин оҥорон турар. Владимир Кимович норуот худуоһунньуга да буолар кыахтаах дии саныыбын. Маастарыстыбатын үрдэтиигэ өрүү дьулуһар. Холобур, аатырбыт маастарбыт, бөлүһүөкпүт Духуобунас академига Мандар-Уус маастар-кылааһыгар үөрэммитэ улахан оруоллааҕа көстөр. Аны өссө киһиҥ сахатын киллэрэн олоҥхоҕо холонон көрүөн дураһыйталыыр эбит… Бу дьоро күн Владимир Аммосов күнэ таҕыста, сулуһа сандаарда. Киниэхэ анаан эҕэрдэ кэнсиэр буолла, бэлэх-туһах туттардылар. Олохтоох маастардар бу хаайтарыы-халтарааҥ, кэмҥэ өрүс кутталлаах суолунан айаннаан кэлэн өйөбүл буоллулар, остуол тардан дьону күндүлээтилэр. Владимир Кимовичка өссө үрдүк ситиһиилэри, доруобуйаны, этэҥҥэ буолууну баҕарыаҕыҥ!
Харалаан.