Дьиэ кэргэн сылыгар анаан Сиинэҕэ «Алгыс» Култуура киинин үлэһиттэрэ түөлбэлэр икки ардыларыгар волейболга күрэх тэрийдилэр. Нэһилиэкпитигэр спорт бу көрүҥэр саамай күүстээх түөлбэ икки хамаанданы туруорда, онон барыта 5 хамаанда кытынна.
Бастакы оонньууттан саҕалаан бэрт хатыһыылаах киирсиилэр буоллулар. «Ямщицкая-1» уонна «Ямщицкая-2» хамаандалар үчүгэй оонньууну көрдөрдүлэр. Көрөөччүлэр хаһыытаан-ыһыытаан оонньуулары сытыырхатан биэрдилэр.
Хамаандалар толорулара астыннарда, бары да кыайыыга дьулуһан кэлбиттэрэ хайҕаллаах. «Ямщицкая-1» оҕолортон турар хамаандаҕа күүстээх быһыылаах, подачалаах Денис Христофоров буолла. Ира Власова подачата, мээчиги чэпчэкитик ылара барыбытын сөхтөрдө. Бу хамаанда олус үчүгэйдик оонньоон көрөөччүлэри астыннарда.
«Заимка» хамаандата бэлэмнээҕин, түмсүүлээҕин туоһулаата. Араас албастаах охсуулардаахтар. Хамаанда оҕолоро Камила Ефремова, Владлен Севостьянов уонна Мира Слепцова улахан дьон күүстээх быһыыларын ылан хамаандаларыгар элбэх очукуону аҕаллылар. Владилен Севостьянов блокка үчүгэй түгэннэри көрдөрдө.
Россияҕа Дьиэ кэргэн сыла буоларынан, бу күрэххэ хас хамаанда аайы дьиэ кэргэннэр оонньоотулар. «Заимкаларга» Иннокентий
Слепцов кэргэнинээн Ульяналыын уонна кыыстара Мира буолан, «Ямщицкая-2» хамаандаҕа кэргэнниилэр Александр, Клавдия Цыганковтар оонньоотулар. «Заимка» күүстээх оонньооччута Татьяна Семёнова уолунаан Денис Христофоровтыын албастаах оонньуулары көрдөрдүлэр.
Бу курдук олус сытыы, тыҥааһыннаах киирсиилэр түмүктэринэн «Ямщицкая-2» хамаанда бастаата,
2-с миэстэни «Заимка» түөлбэ ылла уонна
3 миэстэҕэ «Арчы» хамаанда тигистэ.
Күрэхтэһиини көрө олорон элбэх да киһи волейболу таптыыр, сэргиир, оонньуур эбит диэн санааҕа кэлэҕин. Сааскы дьиэ иһинээҕи-таһынааҕы үлэ элбэҕин үрдүнэн, бу күрэх үрдүк таһымнаахтык, бэлэмнээхтик ааста. Тэрийээччилэр орто оскуола дьаһалтата спортивнай саалатын көҥүллээбитигэр улахан махталларын тиэрдэллэр.
Лариса Леверьева, Сиинэ с.
Санатар буоллахха, быйыл Россияҕа биллэриллибит Дьиэ кэргэн сылыгар «Всей семьей» бырайыак үлэлиир. Бу бырайыак чэрчитинэн кыттааччылар араас тэрээһиҥҥэ сылдьан, уустуга суох сорудахтары толорон бириистээх оонньууга кыттыахтарын сөп.
Бырайыак сайта👉 всейсемьей.рф