Олоҥхо Ассоциациятын 25 сылыгар
“Сэргэлээх уоттара” Култуура киинигэр Олоҥхо декадатын түмүктүүр үөрүүлээх тэрээһин өрөспүүбүлүкэбит “Олоҥхо Ассоциацията” уопсастыбаннай тэрилтэтин 25 сылыгар ананна. Тэрээһин, үгэс быһыытынан, Култуура коллеһын төрүт култуураҕа салаатын уһуйааччыта, СӨ үөрэҕириитин туйгуна Михаил Винокуров алгыһынан саҕаланна.
Үбүлүөй аһыллыыта СӨ Култуураҕа уонна духуобунай сайдыыга миниистирэ Афанасий Ноев истиҥ-иһирэх эҕэрдэтылынан саҕаланна. Кини министиэристибэ аатыттан өрөспүүбүлүкэбит “Олоҥхо Ассоциацията” түмсүү президенигэр Февронья Шишигинаҕа Махтал сурук туттарда. Дьэ, ол кэннэ, бу уопсастыбаннай тэрилтэ олохтоноругар олук уурсубут ытык дьоммут тахсан түмсүү туһунан кылгастык санаан-ахтан аастылар.
Улуус дэлэгээссийэлэрэ Бүлүү бөлөх, хоту, илин эҥэр, киин улуустарынан тахсаммыт Ассоциацияларбыт үлэлэрин сырдаттыбыт, үбүлүөйдээх сылларынан улуустар дьаһалталарын, Олоҥхо Ассоциацияларын ааттарыттан эҕэрдэ суруктары, өйдөбүнньүк бэлэхтэри үөрүүлээх быһыыга—майгыга туттардыбыт. Дьоро киэһэҕэ кэлбит бары ыалдьыттарга “Олоҥхо Ассоциацията” логотиптаах чороонун өйдөбүнньүк бэлэх туттардылар, тэрээһин бастакы чааһа Култуура коллеһын устудьуоннарын оһуокайынан түмүктэннэ, өйдөбүнньүк хаартыскаҕа түстүбүт.
Киэһэлик тэрээһин иккис чааһа эдэр ыччат аныгы үҥкүүтүнэн саҕаланна, бас-көс дьоммут Афанасий Ноев, Андрей Борисов, Февронья Шишигина, Ил Түмэн дьокутаата Владимир Егоров эҕэрдэлээтилэр уонна олоҥхоҕо анаммыт күрэстэр тэрээһиннэрин түмүктэринэн кыайыылаахтарга дьоһун бэлэхтэри туттардылар. Биһиги улууспутуттан “Арчы Дьиэтэ” норуот айымньытын киинин уус-уран салайааччытыгар Мотрена Гаврильеваҕа өрсыллаах үлэтин түмүгүнэн миниистир Афанасий Ноев “За вклад в сохранение и популяризацию героического эпоса Олонхо” Ил Түмэн бастакы вице-спикерэ Александр Жирков илии баттааһыннаах Бочуотунай грамотаны туттарда.
Тэрээһин Олоҥхо тыйаатырын бырайыагынан ХИФУ устудьуоннара кыттыылаах олоҥхо сүрүн дьоруойдарынан аныгылыы дьүһүйүүнэн түмүктэннэ. Мустубут дьон биир тыынынан көрөн олоҥхо тыйаатырын артыыстара сайдыбыттарыттан сөхтүбүт, сүргэбит көтөҕүлүннэ. Түмүккэ саҥа тутулла турар Олоҥхо киинин бырайыагын көрдөрбүттэригэр көрөөччүлэр дуоһуйбуппутун биллэрэн, үөрүүбүтүттэн «Ноо” диэн сэҥээрэн түмүктээн ис турукпут сырдаан, өрө көтөҕүллэн тарҕастыбыт.
Өссө төгүл өрөспүүбүлүкэбит “Олоҥхо Ассоциацията” уопсастыбаннай тэрилтэтэ 25 сыллаах үбүлүөйүнэн Хаҥаластааҕы олоҥхо түмсүүтүн, улууспут дьаһалтатын аатыттан истиҥник эҕэрдэлиибит, олоҥхоҕо бэриниилээх дьон үлэлиир буолаҥҥыт киһи-аймах тылынан уонна өйүнэн айбыт чулуу айымньыбыт Аан дойду шедеврэбуолан аатыран өрөспүүбүлүкэбитигэр Олоҥхо ыһыахтараүрдүк таһымнаахтык ыытылланнар талба талааннаахтарбыт, ылбаҕай ырыаһыттарбыт бу ыһыахтартан кынат анньынанАар саарга аатырдылар, үүнэр көлүөнэ ыччаттарбыт култуура эйгэтигэр үөрэнэн, идэ оҥостон сайдан-үүнэниһэллэр. Баҕарабыт эһиэхэ үрдүк ситиһиилээх, айымньылаах үлэни, дьиэ кэргэҥҥитигэр дьолу-соргуну, уһун уйгулаах олоҕу!
Лидия Харитонова, “Арчы дьиэтэ” норуот айымньытын киинин салайааччыта, Хаҥалас улууһун “Олоҥхо Ассоциацията” түмсүү салайааччыта.