Ыччат – олоҕу хамсатар күүс. Ол да иһин, ханнык да улахан тэрээһин ыччат кыттыыта суох кыаллыбат. Олоххо көхтөөх көрүүлээх, үтүө санаалаах, үлэттэн куотуммат, үөрэҕин таһынан үлэлиир, эбиитин уопсастыбаннай дьыаланан дьарыктанар ыччаты киһи эрэ хайгыы, киэн тутта көрөр буоллаҕа.
Төхтүр нэһилиэгэр Варвара Захарова ыччат бэлиитикэтин испэсэлииһинэн саҥа үлэлээн эрэр.
Нэһилиэкпитигэр ыччат аҕыйах да буоллар, үлэ син биир ыытыллар. Үксүлэрэ устудьуоннуу сылдьаллар, атыттар манна бүддьүөт тэрилтэлэригэр үлэлииллэр. Ханна баҕар буоларын курдук, общественнай үлэҕэ көхтөөхтүк тахсабыт, уолаттар олохтоох кырдьаҕастарга дьиэ тас үлэтигэр көмөлөһөллөр, субуотунньуктары тэрийэллэр. Төхтүр ыччата уруккуттан спорт өттүгэр көхтөөх, билигин да ол үгэспитин бырахпакка сүрүн тэрээһиннэрбит чөл олоҕу, физическай култуураны сайыннарыыга ыытыллаллар. Хомойуох иһин, манна тыа хаһаайыстыбатынан, бородууксуйа оҥорон таһаарыынан дьарыктанар ыччаттарбыт суохтар.
Мин санаабар, билиҥҥи кэмҥэ ыччат лидерэ дьоҥҥо, норуокка бэриниилээх, атыттартан ураты, саҥа көрүүлээх буолуохтаах. Биһиги сайдыылаах үйэбитигэр дьону бэйэтигэр сатаан тардар, кинилэри кытта сөптөөх тылы булан кэпсэтэр, үлэлэһэр киһи ыччат испэсэлииһэ буолар, — диэн Варвара кэпсээтэ.
Эдэр испэсэлиистэр уонна лидердэр ыччат бэлиитикэтин Хаҥалас улууһугар сайыннаран, ситиһиилэрин сырдатан, үөрэтэн, сомоҕолоһон үлэлэрин өссө көхтөөхтүк ыыта туралларыгар баҕарабын.
Татьяна Владимирова.