Саха тыла сүтэн симэлийэн эрэр диирбит оруннаах дуо? Билиҥҥи үйэҕэ, хомойуох иһин, сахабыт тыла симэлийэр кутталлаах. Бу сытыытык турар тыын боппуруос буолар. Төрөөбүт тылбыт сайдарын туһугар диэн сыаллаах тэриллибит Покровскай 1-кы №-дээх орто оскуолатыгар «Күн» оҕо хамсааһынын кытта көрсүһүүгэ Тиит Арыы оскуолатыттан мин, Архипова Катя, Сеялова Арина буоламмыт кытынныбыт. Саха тылын дьылҕатын туһугар долгуйар, биир интириэстээх оҕолор мустан, уу сахалыы кэпсэтэн, санаабытын үллэстэн бэрт сэргэх тэрээһин буолла.
Хас да хамаандаҕа арахсан саха тылын инники сайдыытын, оҕолорго хайдах тиэрдэр туһунан бырайыак оҥорон көмүскээтибит. Биһиги бырайыакпыт «Саха тылын, култууратын, фольклорун хабан аныгы технологияны туһанан сахалыы оонньуу приложениятын оҥоруу» диэн. Түмүгэр бастыҥтан бастыҥ оҕолор «Күн» оҕо түмсүүтүгэр киирдилэр.
Маннык оҕо хамсааһына тэриллибитэ, биһиэхэ, оскуола оҕолоругар, олус наадалаах. Аныгы ыччат төрөөбүт тылбытын өрө тутуохтаахпыт. Сүппэтин-симэлийбэтин туһугар бары күүспүтүн ууран туран үлэлэһиэхтээхпит. Бу курдук тэрээһиннэр өссө да буола турдуннар.
Таисия Стручкова, Г.В. Ксенофонтов аатынан Тиит Арыы орто оскуолатын 11кылааһын үөрэнээччитэ,«Айылгы» пресс-киин.