Үөрэх эйгэтэ
П.И. Шадрин аатынан Өктөм орто оскуолатыгар буоскуола бибилэтиэкэрэ Галина Максимовна Гаврильева өрөспүүбүлүкэ оскуолаларын бибилэтиэкэрдэригэр «Библиотечное краеведение как средство патриотического воспитания учащихся в современных условиях» авторскай семинарын ыытта. Барыта 9 улуустан, Дьокуускай куоратуонна куорат таһынааҕы оскуолалартан 60 бибилэтиэкэр кыттыыны ылла. Семинар үрдүк таһымнаахтык ааста диэн кыттааччылар бэлиэтээтилэр.
Бу күн ыалдьыттарга оскуола устун экскурсия тэрилиннэ, оскуола историятын кэпсээн, музейбытын көрдөрдүбүт. Нэһилиэк историятын кэпсиир, сэрии кыттыылаахтарын, тыылга үлэлээбит биир дойдулаахтарбыт туһунан кинигэлэр, Галина Максимовна өр сылларга историяны, буойун-учууталлар олохторун туһунан, олоҥхо тематыгар, төрүччүлэри чинчийиигэ үлэлэрэ, ону сэргэ үөрэнээччилэр араас темаларга чинчийбит үлэлэрэ, оҕуруонан араас оҥоһуктара быыстапкаҕа турдулар.
Семинар үөрүүлээх арыллыытыгар оскуола дириэктэрэ, РФ үөрэҕириитин бочуоттаах үлэһитэ Калиста Афанасьева, Хаҥалас улууһун бибилэтиэкэрдэрин методиһа Виктория Васильева, Өктөм нэһилиэгин бибилэтиэкэрэ Мотрёна Павлова, Өктөм орто оскуолатын саха тылын учуутала Светлана Яковлева тыл эттилэр.
Семинары ааптар Галина Гаврильева бэйэтэ иилээн-саҕалаан ыытта. Кини өр сылларга нэһилиэк бибилэтэкэрэ Мотрёна Егоровналыын кыраайы үөрэтиигэ бииргэ үлэлээбиттэрин, ол түмүгэр Өктөм нэһилиэгин историятын туһунан хас да кинигэ бэчээттэнэн тахсыбытын кэпсээтэ. Кыраайы үөрэтии үлэтэ кэлэр кэнчээри ыччаты, оҕону иитиигэ улахан суолталааҕын тоһоҕолоон бэлиэтээтэ, оҕолору чинчийэр үлэҕэ дьарыктыыр уопутун кэллиэгэлэригэр үллэһиннэ. Ол курдук, 7 «а» кылаас үөрэнээччитэ Саша Максимова бэйэтин төрүччүтүн оҥорбутун, 9 “а” кылаас үөрэнээччитэ Сардаана Гоголева түөрт уолун сэриигэ атаарбыт хоодуот ийэ Мария Ивановна Шевелёва туһунан кэпсээн дьон сэҥээриитин ыллылар.
Галина Максимовна саха суруйааччыларын, улуус биллиилээх дьоннорун тустарынан библиографическай-методическай пособиелары сериянан таһааран сыл аайы фондатын хаҥатар. Бу оҥорор пособиеларыгар тустаах киһи туһунан сүрдээх элбэх матырыйаалы киллэрэр. Холобура, киһи олоҕун кэрчигин хаартыскаларынан биографиятын, айымньыларын, үлэлэрин, киниэхэ анаммыт хоһооннору, ыстатыйалары, бэлэм литературнай биэчэр сценарийдарыгар тиийэ, оҕолорго аналлаах викториналары, кинигэ быыстапкаларын ааттарын, цитаталары, кини айымньытынан киинэлэри, видеосюжеттары, аудиокинигэ матырыйаалларын истиэххэ-көрүөххэ син. Маны таһынан, уопуттаах бибилэтиэкэр аныгы онлайн сервистары туһанан оҕону кинигэни ааҕыыга интэриэһиргэтэр туһуттан виртуальнай кинигэ быыстапкаларын, буктрейлердары, араас литературнай оонььуулары тэрийэр уопутун үллэһиннэ.
Галина Гаврильева бэйэтэ оҥорбут сайта мустубут дьон болҕомтотун тарта. Бу сайт оҕо саадын иитиллээччилэригэр, оскуола үөрэнээччилэригэр, төрөппүккэ, иитээччигэ, учууталга үөрэтэр-иитэр үлэҕэ аналлаах элбэх матырыйааллааҕа сөхтөрдө. Оҕону кыра сааһыттан кинигэҕэ угуйар туһуттан үөрэх бырагырааматынан оҕолор сахалыы, нууччалыы кинигэлэри ааҕалларыгар анаан электроннай бибилэтиэкэ оҥоһуллубут. Оҕо хаһан баҕарар онно киирэн сөбүлээбит кинигэтин ааҕыан сөп. Ону таһынан, икки тылынан аудиокинигэлэри истиэххэ, мультфильмнары, сахалыы киинэлэри дьиэ кэргэнинэн көрүөххэ сөп. Бу сайтка кыраайы үөрэтиигэманнык киэҥ, баай матырыйаал баара ыалдьыттары сөхтөрдө. Мантан Өктөм нэһилиэгин историятын, сэрии,тыыл бэтэрээннэрин испииһэктэрин, хаартыскаларын, ахтыыларын, буойун-учууталлар, тыылга үлэлээбит оскуола оҕолорун ахтыыларын, буойун-суруйааччылар, оскуола историятын (учууталлар, выпускниктар тустарынан матырыйааллары), нэһилиэкпит Герой-ийэлэрин, араас темаҕа аналлаах хоһооннору, таабырыннары, өс хоһооннорун о.д.а. матырыйааллары булуохха сөп. Онон биһиги бибилэтиэкэрбит бу курдук сайт оҥоруон баҕалаах дьоҥҥо туһалаах сүбэлэри биэрдэ.
Семинары Галина Гаврильева оскуола технологияҕа учуутала Милена Ивановналыын музыкальнай нүөмэринэн түмүктээтилэр, үөрэнээччилэр Галина Максимовна оҕуруонан тикпит симэхтэрин кэтэн көрдөрдүлэр, ыалдьыттары кэрэ эйгэтигэр киллэрдилэр.
Светлана Яковлева, П.И. Шадрин аатынан Өктөм орто оскуолатын сахатылын учуутала.