Эдэр саас өйдөбүлэ куруук сырдык, ыраас, сылаас буолар. Бүгүн биһиги кэрэ айылҕалаах сирбитигэр олохсуйбут мааны Далбар Хотуну билиһиннэриэхпин баҕарабын.
Розалия Жигалова 1979 сыллаахха 1-кы Дьөппөн нэһилиэгэр 24 кэрэ кыыс оҕуруокка үлэлии кэлбиттэриттэн биирдэстэрэ буолар. Бу кэмҥэ, дьиҥ чахчы, дойдуга таһаарыылаах үлэ өрөгөйдөөх кэмнэрэ этэ, ханна да дьон-сэргэ өрө көтөҕүллүүлээхтик, түмсүүлээхтик, айымньылаахтык уонна бэриниилээхтик үлэлииллэрэ.
— Биһигини манна олохтоохтор наһаа үчүгэйдик көрсүбүттэрэ. Бу дойдуну сөбүлээн 10 кыыс олохсуйан хаалбыппыт. Билигин үтүө суобастаахтык үлэлээбит сопхуоспут бары үлэһиттэрин, бэтэрээннэрин ытыктаан ахтабын-саныыбын, ыччаппар киэн тутта кэпсиибин, хаартыскаларбытын куруук көрдөрөбүн , — диир Розалия Афанасьевна. — Киэҥ көҕүстээх, сахалыы сайаҕас, истиҥ, сылаас сыһыаннаах, сырдыгынан сыдьаайар эйэҕэс эбээлэри мэлдьи саныыбын — Анна Павловна Филиппова сахалыы лэппиэскэнэн күндүлүүрүн, Матрена Петровна Попова тэллэйинэн, минньигэс аһынан маанылыырын, Анна Петровна Данилова куруук саҥа сонуннаах хаһыат киллэрэн кэпсиирин, ааҕарын. Сүбэһиттэрбитин Екатерина Петровна Павлованы, Анастасия Павловна Мартынованы, Мария Ивановна Федорованы, Клара Терентьевна Захарованы, Софья Николаевна Скрябинаны, Прасковья Васильевна Борисованы, Варвара Николаевна Васильеваны, Зоя Павловна Мартынованы хаһан да умнубаппын. Бу үлэлиир кэмнэрбэр былааммытын толорон сопхуоспут чемпион үрдүк аатын сүгэн Ленинград куоракка бэтэрээннэри кытта күүлэйдии сылдьыбытым. Күһүн төрдүө буоламмыт — мин, Галина Варламова, Татьяна Слепцова, Лариса Львова путевканан Узбекистаҥҥа дуоһуйа сынньанан, астынан кэлбиппит. Биһиги үлэҕэ, сынньалаҥҥа бары бииргэ сылдьарбыт: муҥхалыырбыт, куобах күрэҕэр кыттарбыт, сир астыырбыт. 1987сыллаахха олоҕум аргыһын көрсөн, механизатор идэлээх Алексей Аркадьевич Жигаловтыын ыал буолбуппут. Күн сирин көрдөрбүт икки уоллаахпыт — улахаммыт Аркадий Алексеевич, баһаарынай чааска үлэлиир, кэргэнэ Варвара Валерьевна география учуутала, орто оскуолаҕа дириэктэри иитэр үлэҕэ солбуйар, кыыс оҕолоохтор, иккис уолбут Алексей Алексеевич технология учууталынан үлэлиир, — диэн ыал ийэтэ сэмэйдик дьиэ кэргэнин билиһиннэрдэ.
Розалия Афанасьевна муударай ийэ, эйэҕэс эбээ эрэ буолбатах, кини айылҕаттан уруһуйга, иискэ дьоҕурдаах, аны хоһоон айар талааннаах. Кини нэһилиэкпит тэрээһиннэригэр саамай көхтөөх кыттааччыбыт. Розалия талба талааныгар сүгүрүйэн туран сир үрдүгэр баар үтүөнү, кэрэни баҕарабын! Дьонуҥ тапталларыгар куустаран хоһоонноруҥ хоһулла, айылла турдуннар!
Анастасия Мордовская, Тиит Эбэ с.