Үлэһиттэргэ аналлаах «Кыһыл муннук» баар буолла

Төхтүр нэһилиэгин «Хахсык» тэриллиилээх хаһаайыстыба урут үлэлээн ааспыт бэтэрээннэрин уонна билигин хаһаайыстыбаҕа үлэлии сылдьар дьонун түмэн Россия уонна Саха сирин тыатын хаһаайыстыбатын күнүгэр аналлаах тэрээһини ыытта.

Дьоро күн хаһаайыстыба үлэһиттэригэр анаан сынньанар «Кыһыл муннук» арыллыытыттан саҕаланна. Саҥа тутууну арыйыы сиэрин-туомун алгысчыт Андриан Белолюбскай ыытта — Аал уоту оттон үрүҥ аһынан айах тутан, арыылаах алаадьынан күндүлээн Үрдүкү Үрүҥ айыыларга сүгүрүйдэ. Ол кэннэ «Кэскил» ансаамбыл хомуска дьүрүһүйэ оонньоото. Улуустааҕы Тыа хаһаайыстыбатын департаменын салайааччы Андрей Архипов, олохтоох дьаһалта сүрүннүүр испэсэлииһэ Евгений Ильин уонна хаһаайыстыба салайааччыта Тамара Осипова аалай лиэнтэни быстылар.

«Кыһыл муннук» иһэ киэҥ-куоҥ, сырдык, сылаас. Үлэһиттэргэ ананан оҥоһуллубут тупсаҕай туттар мал-сал туруоруллубут. Инникитин ааҕар муннук уонна да атын былааннарбыт олоххо киириэхтэрэ диэн салайааччы Тамара Осипова иһитиннэрдэ.

Салгыы бэтэрээн үлэһиттэргэ анаммыт сынньалаҥы, Култуура киинигэр тардыллыбыт баай-талым сандалы остуолу култуура үлэһиттэрэ сэргэхтик ыыттылар. Кэлбит бэтэрээннэри Тыа хаһаайыстыбатын департаменын салайар Андрей Архипов, олохтоох дьаһалта, дьокутааттар, Хаҥалас улууһун, Өктөм нэһилиэгин Бочуоттаах олохтооҕо, үлэ бэтэрээнэ Николай Константинов эҕэрдэлээтилэр, Махтал суруктары туттаран үөрүүлэрин үрдэттилэр. Үөрүүлээх тэрээһин кыттыылаахтара инникитин даҕаны ситиһиилэр кэлэ турдуннар, хаһаайыстыба сайдан-үүнэн истин диэн үтүө баҕа санаалаах тарҕастылар.

Мотрена Ефремова, Төхтүр с.