Нөмүгү нэһилиэгэр Павел Яковлев көҕүлээһининэн доруобуйаларынан хааччахтаах дьоҥҥо аналлаах “Ымыылаах ыллык” ырыа күрэһэ иккис сылын бэрт тэрээһиннээхтик ааста.
Дьүүллүүр сүбэҕэ Хаҥалас улууһун ”Арчы дьиэтэ” норуот айымньытын киинин салайааччыта Лидия Харитонова, А.Д.Широких аатынан Төхтүр оскуолатын учуутала, ырыаһыт-баянист Николай Макаров, Павел Яковлев олоҕун аргыһа Виктория Лебедева үлэлээтилэр. Быйыл куонкуруска Дьокуускайтан, Уус Алдантан, Бүлүүттэн барыта 14 ырыаһыт кытынна. Маннык улахан суолталаах тэрээһиҥҥэ Хаҥаластан ким да кыттыбатаҕа хомолтолоох.
Күрэс иннинэ СӨ Көрбөттөр уопсастыбаларын бэрэссэдээтэлэ Ибрагим Ишниязов Павел Яковлевка ааспыт сыл үлэ түмүгүнэн өрөспүүбүлүкэҕэ ыытыллар култуура тэрээһиннэригэр бастыҥ көрдөрүүтүн иһин Диплому үөрүүлээх быһыыга туттарда.
Бу күн ылбаҕай ырыа арааһа ылланна, “Түһүлгэ” култуура киинин иһэ баян доҕуһуоллаах кэрэ куоластаахырыаһыттары түмэн көрөөччүлэр сүргэлэрин көтөхтө.Бэлиэтээн эттэххэ, ырыаһыттарга баяҥҥа оонньоон күүс-көмө буолла СӨ баянистарын Союһун чилиэнэ, СӨ култууратын туйгуна, мелодист Алексей Потапов.
Көрүү-күрэс үс түһүмэҕинэн ааста, бастакы түһүмэххэ Дьокуускайтан Кыыдан Моисеев бастаата, 2-с миэстэ Уус Алдантан Долгуна Иванова, 3-с миэстэ Бүлүүттэн Сайыына Егорова буоллулар.
Иккис түһүмэххэ Уус Алдантан кэлэн кыттыбыт Иван Карпов Кылаан чыпчаалы ылары ситистэ, 1-кы миэстэни Валентин Суздалов ылла, 2-с эмиэ Петр Андреев буолла, 3-с миэстэҕэ Сергей Винокуров тигистэ, үһүөн Дьокуускайтан кэлэн кытыннылар.
Үһүс түһүмэххэ Егор Афанасьев (Уус Алдан) кыайыылаах ааттанна, 2-с Ибрагим Ишниязов Дьокуускайтан буолла уонна 3-с миэстэни Анастасия Степанова Уус Алдантан ылыан ылла. Күрэс кыттылаахтара бары сыаналаах бириистэри туттулар. Кылаан чыпчаалы ылбыт кыайыылаахха Яковлевтар дьиэ кэргэн 15 000 солкуобайы уу харчынан туттардылар.
Түмүккэ Павел Яковлев нэһилиэк култууратын үлэһиттэригэр, күрэскэ кэлэн кыттыыны ылбыт дьоҥҥо истиҥник махтанна.