Бу Лера Добрянцеваны, билигин кэргэнинэн Петрованы, Кытыл Дьураттан ытыктыыр киһибит Анатолий Добрянцев быраатын Леонид кыыһын, мин оҕо эрдэҕиттэн билэбин. Оскуолаттан ыллыыр кыысчаан. Иһит оскуолатын үбүлүөйүгэр баран сахалыы ыллаан соһуппуттааҕа ээ, уонча сыллааҕыта.
Биирдэ Анатолий ийэтигэр, бастыҥ ыанньыксыт, герой-ийэ Антонина Семеновна Добрянцеваҕа Паасха иннинээҕи күн ыраас чэппиэргэ ыалдьыттаан аһаары көрсүбүтүм этэ, Лерочканы, кыысчаан эбээтигэр муоста сууйа сылдьара. Кэлин оскуоланы ситиһиилээхтик бүтэрбитин, кэргэн тахсан икки оҕолонон үчүгэйкээн ыал буолан Дьокуускайга олорорун, кэтэхтэн үөрэнэ сылдьарын истибитим. Ол быыһыгар бу сэлиэһинэй өҥө баттаахтаах нуучча кыысчаана батсаап ситимигэр Бүтэйдээх, ийэ туһунан уу сахалыы ыллыырын сотору-сотору көрөрүм, ырыатын быраҕа илигин истэн үөрэрим.
Былырыыҥҥыттан, быһыыта, Валерия Петрованы «Потомки государевых ямщиков» общественнай түмсүү тэрээһиннэригэр көрөр буоллум — аны кини ансаамбылга ыллыыр. Соторутааҕыта Иһит нэһилиэгин кинигэтин билиһиннэрии дьоро күнүгэр түгэн булан дьэ кэпсэттим. Олоҕун-дьаһаҕын сэһэргии түһэригэр көрдөстүм:
— Биһиги ыал Мархаҕа олоробут, кэтэх дьиэлээхпит.Быйыл аҕам кыстыы киирбитэ, көмөлөһө таарыйа. Мин билигин Ис дьыала министиэристибэтигэр үлэлиибин. Бу иннинэ оскуолаҕа үлэлии сылдьыбытым. Кэргэним — Кытыл Дьураттан. Икки оҕолоохпун — кыыһым Ульяна аҕыс саастаах, иккис кылааска үөрэнэр, уолчааным Виталий алталаах, уһуйаан киһитэ. Эбээбит Антонина Семеновна олохтон барбыта… Билигин кини дьиэтигэр кыһын ким да олорбот. Убайдарым Стас, Александр дойдуларыгар кэлэ-бара сылдьаллар. Валерий убайбыт аах Дьураҕа бааллар, уолунаан ОДьХХ-ҕа үлэлииллэр.
— Бары ырыа куттаах дьоҥҥут, Добрянцневтар, Петровтар…
— Оннук бөҕө! Мин ыллыырбын сөбүлүүбүн. Билигин Юта Стрекаловская салайар «Ямская гармонь» ансаамбылыгар сылдьабын. Олус астынабын! Араас ырыаны сөбүлүүбүн, нууччалыыны, сахалыыны. Анастасия Пильникова диэн саҥа музыкальнай салайааччыланныбыт, фольклорнай ырыалары ыллыырга үөрэнэбит. Олус сөбүлээтим, саҥа таһымҥа тахсан эрэбит. Элбэх тэрээһиҥҥэ кыттабыт.
— Оттон дьиэ кэргэниҥ, оҕолоруҥ ыллыыллар дуо?
— Кэргэним сыанаҕа тахса үөрүйэҕэ суох буоллаҕа, мээнэ ыллаабат. Онтон оҕолорбун дьаамсыктар ырыаларыгар уһуйа сатыыбын. Өксөкүлээх Өлөксөй аатынан норуоттар Доҕордоһууларын дьиэтигэр араас тэрээһиннэргэ кыттабыт, видеоларга уһуллабыт. Кыыспынаан быйыл «Играй, гармонь — живи, частушка!» куонкуруска кыттан, «Валенки» ырыаны ыллаан иккис истиэпэннээх лауреат буолан үөрбүппүт. Биһиги оҕолор ансаамбылларын тэрийиэхпитин баҕарабыт. Оччоҕо ыччаттарбыт искусствоҕа өссө сыстыа этилэр дии саныыбыт. Личность, киһи быһыытынан сайдыыга ырыа, биллэн турар,көмөлөһөр буоллаҕа. Кыыһым бастаан үҥкүүгэ сылдьан испитэ, Москваҕа куонкуруска кытары кыттан кэлбиттэрэ. Билигин «Нота До» вокальнай бөлөххө сылдьарга быһаарынныбыт, бу бөлөҕү биһиги ансаамбылбыт кыттыылааҕа Арина Алексеева тэрийбитэ, кини Үөдэйтэн төрүттээх, өссө мин ийэбинэн эдьиийим буолар. Уолчааным ыллыы, үҥкүү илик. Кэтээн көрө сылдьабын, туохха сыһыаннааҕын, бука, спорт диэки хайыһара буолуо, мэһэйдэһиэм суоҕа. Ол эрээри төрүт дьаамнарым култууратын билэригэр хайаан да кыһаллыам. Ырыа диэн биһиги олохпут аргыһа буоллаҕа!
— Ситиһиилэри баҕарабын, Валерия! Инникитин даҕаны нарын, кэрэ, дууһаны сылаанньытар ылыаларгын истиэхпит диэн эрэнэбит.
Людмила Мордовская.