Хаҥалас улууһа «Хаҥаластар буолабыт» өрөгөй ырыатын мелодиятын автора, 1-кы дьөппөннөр баар-суох тарбахха баттанар биир дойдулаахпыт, Саха Өрөспүүбүлүкэтин култууратын туйгуна, мелодист, самодеятельнай композитор Михаил Степанович Атласов 85 сааһын бар дьонун кытта бэлиэтиир, өрөгөй ырыата 25 сылын туолар үбүлүөйдээх күннэригэр бар дьоммут «Сарыал» култуура киинигэр муһуннулар.
Ыалдьыттары киирии ааҥҥа буруолатан арчылаан, арыылаах алаадьынан, кыынньар кымыһынан айах туттубут.
Үбүлүөйдээх киэһэни 1-кы Дьөппөн нэһилиэгин Тиит Эбэ хорун толоруутугар «Хаҥаластар буолабыт» өрөгөй ырыатынан саҕалаатыбыт. Бу киэһэ Хаҥалас улууһун Аҕа баһылыга Олег Иринеев Михаил Степановичка Хаҥалас улууһун социальнай-экономическай сайдыытыгар кылаатын иһин бочуоттаах бэлиэ туттарда, 1-кы Дьөппөн нэһилиэгин баһылыга Дмитрий Варламов «Сарыал» култуура киинигэр М.С. Атласов аатын иҥэрэргэ олохтоох дьокутааттар быһаарыы ылбыттарын ааҕан иһитиннэрдэ, эҕэрдэ кэрэ тылларын тиэртэ.
Истиҥ эҕэрдэлэрин Михаил Степановичка Арчы дьиэтин дириэктэрэ Лидия Харитонова, үлэлээбит култууратын дьиэтин дириэктэрэ Мария Михайлова, биир дойдулаахпыт, Россия суруналыыстарын союһун чилиэнэ Ермолай Скрябин, Михаил Степанович уола Петр бииргэ үөрэммит үөлээннэхтэрэ тиэртилэр.
Үбүлүөйдээх ытык киһибитигэр оҕолоро, сиэннэрэ, аймахтара тахсан истиҥ-иһирэх тыллары анаатылар, минньигэс туортунан бар дьоннорун күндүлээтилэр. Ол кэннэ Михаил Атласов 85 сааһыгар анаммыт «Ырыа — олох аргыһа» дьиэ кэргэнинэн ырыа толорооччуларын күрэҕэ үрдүк таһымҥа ыытылынна.
Күрэх балаһыанньатынан кыттааччылар иккилии ырыаны икки түһүмэҕинэн толордулар. Биир ырыалара патриотическай, иккис ырыа — көҥүл. Күрэххэ 9 дьиэ кэргэн кытынна. Бары ырыа куттаах, ырыаны доҕор оҥостубут дьиэ кэргэттэр буолаллар. Түмүккэ 50 000 солкуобай уу харчынан кылаан бирииһи Өктөм сэлиэнньэтиттэн кыттыбыт Фоминнар дьиэ кэргэннэрэ ылла. 1-кы истиэпэннээх лауреат аатын Тумултан Максимовтар дьиэ кэргэн, 2-с истиэпэннээх лауреат аатын Амматтан Матвеевтар дьиэ кэргэн уонна 3-с истиэпэннээх лауреат аатын Булгунньахтаах сэлиэнньэтиттэн Давыдовтар дьиэ кэргэннэрэ ыллылар. 1-кы истиэпэннээх Дипломант аатын Покровскай куораттан Поисеевтар, 2-с истиэпэннээх Диплому эмиэ Покровскай куораттан убайдыы-балыс Харитоновтар, 3-с истиэпэннээх Диплому 1-кы Дьөппөнтөн Марковтар аймахтар ыллылар. Күрэх «Көрөөччү биһирэбилэ» аатын 1-кы Дьөппөнтөн Тарасовтар дьиэ кэргэн, «Дьулуурдаах дьиэ кэргэн» ааты Покровскай куораттан Петровтар ыллылар. Кыайыылаахтар, анал ааты ылбыттар бары 1-кы Дьөппөн нэһилиэгин тэрилтэлэрэ туруорбут сыаналаах бириистэринэн наҕараадаланнылар.
Быйылгы сылбыт дойдуга Дьиэ кэргэн сылынан биллэриллибитэ ырыа толорооччулар күрэхтэригэр улахан суолталаах буолла. Дьиэ кэргэнинэн кыттыы, бары бииргэ ыллааһын эмиэ судургута суох үлэ. Кыттыыны ылбыт дьиэ кэргэттэрбитигэр тэрийээччилэр ааттарыттан махталбытын тиэрдэбит. Өссө сайда туруҥ, ыраахха дылы ааккытын ааттатыҥ. Ырыа киһини кэрэҕэ эрэ угуттуур, онон ыллааҥ, ырыаны таптааҥ! Тэрээһиммитин ыытарбытыгар күүс-көмө буолбут дьоммутугар, биир дойдулаахтарбытыгар махталбытын тиэрдэбит!
Мария Михайлова, Тиит Эбэ с.