#ТыаХаһаайыстыбата
Тыа хаһаайыстыбатыгар үүтү туттарыы – саамай тыын боппуруос. Үүт туттарылыннаҕына үрүҥ ас дэлэйэр, олохтоох аспытын-үөлбүтүн аһыыбыт, дьон дохуоттаах буолар. Экономика өттүнэн эрэ буолбакка, тыа сирин олоҕор-дьаһаҕар улахан социальнай суолталаах.
Чапаево сэлиэнньэтигэр хас сарсыарда аайы дьон тоҕуоруһар сирэ «Хаҥалас-Ас» ТХПК үүт тутар пууна буолар. Быйыл манна үүтү 15 хаһаайыстыба туттарар. Үлэһиттэр Анна Кардашевская уонна Матрена Дмитриевна сарсыарда 6 чаастан үлэлэрэ саҕаланар.
— Икки хаһаайыстыба Өктөмтөн уоннааҕылар чапаеволар туттараллар. Кэтэх хаһаайыстыбаттан үүтү 17 солк. тутар буолбуттарын кэннэ тэрээһиннээх эрэ хаһаайыстыбалар туттараллар. Кинилэртэн лиитэрэ үүтү 80-нуу солк. ылабыт. Биһиги үүт тутар пууммут 2022 сылтан манна үлэлиир. Ыам ыйыттан үүтү тутан саҕалыыбыт уонна ахсынньыга диэри үлэлиибит. Күн аайы 490-тан тахса лиитэрэ үүт «Хаҥалас-Аска» барар, – диэн Анна Кардашевская кэпсээтэ.
Татьяна Владимирова.