АСАТУ Өктөмҥөөҕү филиалын 25 сылыгар
2001 сыллаахтан 2010 сылга диэри Дьокуускайдааҕы судаарыстыбаннай тыа хаһаайыстыбатын академиятын Өктөмнөөҕү филиалын агрономия кафедратын профессора, «Гражданскай килбиэн» бэлиэ хаһаайына Арзамас Бойнов дириэктэринэн үлэлээбитэ. Өктөмҥө кини сырдык аатын үйэтитэн уонна филиал 25 сыллаах үбүлүөйүн чэрчитинэн өрөспүүбүлүкэтээҕи научнай-практическай конференция соторутааҕыта ыытылынна.
Арзамас Иванович үйэлээх сааһын тухары үлэтигэр бэриниилээхтик айан-тутан кэлбитэ. Кини үтүө-мааны майгытынан, дириҥ билиитинэн, элбэх научнай үлэлэринэн биллэрэ. Билим эйгэтигэр, устудьуоннарга уонна да атын алтыһан ааспыт дьонугар улахан аптарытыаттааҕа. Арзамас Иванович Сибииргэ бастакынан, Новосибирскай уобаласка анал ынах сүөһү аһын оҥорон таһаарар тэрилтэни үлэлэтэн саҕалаабыта. 2005 сыллаахха Өктөм филиала кини салалтатынан судаарыстыбаннай аттестацияны уонна аккредитацияны ааһан күн бүгүнҥэ диэри үлэлии турар.
Арзамас Бойнов 70-ча агрономия билимин үлэлэрин ааптара, 13 оҥорон таһаарар мэктиэни суруйбут. «Пойма Иртыша» (1975 с.), «Северное земледелие» (2007 с.), «Мелиорация почв Севера» диэн кинигэлэри туһанан устудьуоннар билигин да үөрэнэ сылдьаллар. А.И. Бойнов аата Россия, өрөспүүбүлүкэ тыатын хаһаайыстыбатын билимин сайдыытыгар үрдүк сыанабылга сылдьар.
Арзамас Бойнов аатын үйэтитэр өрөспүүбүлүкэтээҕи научнай-практическай конференция Өктөм филиалыгар 10-тан тахса сыл ыытыллар. Манна үксүн агрономияҕа, агроинженерияҕа, сири туһаныыга анаммыт үлэлэринэн оскуола оҕолоро, устудьуоннар, аспираннар кытталлар.
Быйылгы тэрээһиҥҥэ аан тылы АСАТУ ректора, биолигия билимин доктора Валерий Федоров эттэ. Маны таһынан Арзамас Иванович огдообото Валентина Сергеевна Бойнова кыыһынаан, аймахтара, филиал бэтэрээннэрэ, выпускниктар, үөрэппит оҕолоро кытыннылар. Конференцияҕа кэтэхтэн эмиэ кытыннылар.
А.И. Бойнов аатын үйэтитэр өрөспүүбүлүкэтээҕи научнай-практическай конференция үлэтин түмүгүнэн кыайыылаахтарга уонна призердарга Грамоталары, анал бириистири туттардылар. Туйгун кыттааччыларга Валентина Сергеевна харчынан бириэмийэлэри анаата. Конференцияҕа ааҕыллыбыт үлэлэр хомуурунньукка тиһиллиэхтэрэ.
Үтүө киһи, билиилээх учуонай, сатабыллаах салайааччы Арзамас Иванович аата үйэтитиллэр.
Татьяна Владимирова.