Бары бииргэ
Ахсынньы саҕаланыыта Хаҥалас улууһун баһылыгын солбуйааччыта Юрий Никифоров салайааччылаах дэлэгээссийэ байыаннай дьайыы ыытыллар сиригэр гуманитарнай көмөнү тиксэрэн кэлбитэ. Бу бөлөх түөрт туонна кэриҥэ гуманитарнай көмөнү, аадырыстаах баһыылкалары, байыастарга анаммыт тиэхиньикэ, сэп-сэбиргэл илдьэн уолаттарга тиксэрдэ.
— Запорожскай, Курскай уобаластарынан, Луганскай уонна Донецкай Народнай Өрөспүүбүлүкэлэринэн сылдьан биир дойдулаахтарбытын көрүстүбүт. Сүрүн сыалбытын — биир дойдулаахтарбытын көрсөн наадыйар тэриллэрин тиэрдэриситистибит. Биһиги бөлөҕүнэн арахсан сырыттыбыт, уопсайа 70-ча байыаспытын көрсөн кэллибит.
Маннык айан, биллэн турар, Саха сиринээҕи тирэх пуун волонтердарын көмөтө суох тэриллибэт. Ону сэргэ, биир тутаах киһибит, байыаннай дьайыы ыытыллар сиригэр номнуо сыл кэриҥэ үлэлиир Светланабыт уолаттары кытта быһаччы сибээһи тутан олорор буолан айаммыт табылынна. Биир кэлим координационнай киин тырааныспарынан хааччыйан кылгас кэм иһигэр киэҥ сири кэрийэн этэҥҥэ сылдьан кэллибит.
Бэйэбит илэ харахпытынан уолаттарбыт усулуобуйаларын көрдүбүт. Байыастар чахчы эр хоһууннар, инникигэ эрэллээхтэр, кыайыы биһиэнэ буоларыгар модун санаалаахтар. Оттон биһиги кинилэр бары ирдэбиллэрин, туохха наадыйалларын дьоммут-сэргэбит көмөтүнэн өссө да тиэрдэ-тиксэрэ, өйөбүлбүтүн биллэрэ туруохпут, — диэн Юрий Никифоров кылгастык айанын туһунан иһитиннэрдэ.
Ольга Гермогенова.
Хаартыскалары Юрий Никифоров тиксэрдэ.