Өктөмҥө «Октемский наслег: во имя великой Победы» альбом-кинигэ күн сирин көрдө уонна үөрүүлээх сүрэхтэниитэ буолла.
Альбом-кинигэ 222 страницалаах, 100 ахсаанынан “Дани-Алмас” кинигэ кыһатыгар олохтоох дьаһалта үбүлээһининэн бэчээттэннэ. Альбом-кинигэни Өктөмнөөҕү модельнай бибилэтиэкэ кылаабынай бибилэтиэкэрэ Сардаана Данилова хомуйан бэчээккэ бэлэмнээтэ. Кинигэ тахсарыгар бибилэтиэкэҕэ уһуннук үлэлээбит, билигин да үлэлии-хамсыы сылдьар СӨ култууратын туйгуна Матрена Павлова, редактор СӨ үөрэҕириитин туйгуна Лариса Атласова сүбэ-ама буоллулар.
Өктөмнөөҕү бибилэтиэкэ сүрүн хайысхатынан кыраайы үөрэтии буолар. Матрена Егоровна өр сыллаах үлэтин түмүгэр нэһилиэкпит историятын сырдатар улахан база оҥоһуллубута. Ол онно тирэҕирэн Кыайыы күнүн көрсө нэһилиэкпит сэрии, тыыл бэтэрээннэрин ааттарын ааттатар, үйэтитэр улахан альбом-кинигэ тахсыбыта – бу барыбыт киэн туттуубут.
Кинигэ 6 бастаах. Бастакы баһыгар нэһилиэктэн сэриигэ барбыт дьоннорбут ааттара-суоллара, ханнык чааска тиийбиттэрэ, ханна көмүллүбүттэрэ, сураҕа суох сүппүттэрэ суруллар. Иккис баска ханнык наҕараадалары ылбыттара, үһүскэ — сэрии хас биирдии ыалга киириитэ, төрдүс, бэһис, алтыс бастарга биир дойдулаахтарбыт Аҕа дойду сэриитигэр кыргыспыттарын, тыыл үлэһиттэрэ, оҕолор сэрии кэмигэр үлэлээбиттэрин туһунан ханнык кинигэлэргэ, сурунаалларга, хаһыаттарга тахсыбыт матырыйааллар киирбит испииһэктэрэ бааллар.
Кинигэ биһирэмин үөрүүлээх күнүгэр Өктөм нэһилиэгин баһылыга Александр Большаков олус долгуйан туран альбом-кинигэни таһаарбыт дьоҥҥо ис сүрэҕиттэн махтанна. Хаҥалас улууһун кииннэммит бибилэтиэкэ дириэктэрэ Ираида Адамова маннык кинигэ тахсара нэһилиэккэ эрэ буолбакка, бүтүн Хаҥалас улууһугар олус суолталааҕын бэлиэтээтэ, эдэр үлэһит Сардаана Егоровнаҕа айымньылаах үлэтэ өссө да тэтимирэ турарыгар баҕарда. СӨ суруйааччыларын сойууһун чилиэнэ, биэс кинигэ ааптара, педагогическай үлэ бэтэрээнэ Николай Егоров-Ньукулай Түөлбээкэп сүдү үлэ түмүктэммитинэн кинигэҕэ үлэлэспит дьону хайҕаата, кинигэ эдэр көлүөнэҕэ суолдьут сулус буоларыгар эрэнэрин биллэрдэ. СӨ үөрэҕириитин туйгуна, педагогическай үлэ бэтэрээнэ, бэтэрээн бибилэтиэкэр Зинаида Иванова эдэр үлэһит улахан бастакы үлэтэ түмүктэммитинэн эҕэрдэлээтэ, өссө да инникитин кыраайы үөрэтиигэ ситиһиилэри баҕарда. «Арылы кустук» самодеятельнай худуоһунньуктар Кыайыы 80 сылыгар аналлаах элбэх үлэни оҥорбуттара. Кинилэр хартыыналара эмиэ бу кинигэҕэ киирбитэ үйэтитии биир хайысхата буолар.
Биһирэми Лена Острельдина, Миралюба Саморцева, Александра Старостина, Вера Попова, “Иэйии” ырыа ансаамбылын истиҥ иһирэх ырыалара киэргэттилэр. Кинигэ сүппэт-өспөт өйдөбүнньүк. Хас биирдии көлүөнэ кыайыылаах-хотуулаах олоҕо, үлэтэ кэнчээри ыччакка үтүө өйдүбүл буолан хаалыаҕа.
Федора Фомина, Өктөм с.