1-кы дьөппөннөр сааскы халааҥҥа бэлэмнэнэллэр

1-кы Дьөппөн нэһилиэгэр сааскы көмүөлү көрсөргө бэлэмнэнии үлэ былааннаахтык тэриллэр. Улахан уу кэллэҕинэ манна Тиит Эбэ, Хоточчу сэлиэнньэлэрэ ууга барар кутталлаахтар, онон эрдэттэн олохтоох дьаһалта нэһилиэнньэни сэрэтэр, наадалаах эминэн-томунан, аһынан-үөлүнэн хааччынар.

Күн бүгүн халааны көрсө хайдах дьаһанан олороллорун «1-кы Дьөппөн нэһилиэгэ» МТ баһылыгын солбуйаччыта Лия Самсонова билиһиннэрдэ:

— Тиит Эбэҕэ уопсайа 63 чааһынай дьиэ, Хоточчуга 73 чааһынай уонна 1 муниципальнай эбийиэк – 4 кыбартыыралаах уопсай дьиэ ууга барар кутталлаах. Бу дьиэлэргэ Тиит Эбэҕэ 123 улахан киһи, 37 оҕо, 17 инбэлиит, 7 соҕотох олорор биэнсийэлээх, Хоточчуга 175 улахан киһи, 54 оҕо, 13 инбэлиит, 2 соҕотох олорор биэнсийэлээх дьон олороллор. Аны туран, Хоточчуга чааһынай дьиэлэри таһынан 1 хочуолунайы уонна 6 социальнай эбийиэги – кулуубу, бибилэтиэкэни, оскуоланы, оҕо саадын, ФАПы, бэтэринээринэй учаастагы уу ылыан сөп.
Биһиги баһылыкпыт Дмитрий Варламов бэрэссэдээтэллээх халаан хамыыһыйатын тэрийэн турабыт. Ол курдук, 1-кы Дьөппөн орто оскуолатыгар 150 киһиэхэ, Мыраан үрдэ диэн 3,5 км тэйиччи сиргэ 40 киһиэхэ, балаакканан олорорго анаммыт быстах кэмҥэ олохтуур пууннары тэрийдибит. Акватабс, деохлор, сульфохлорантин-Д саппааһа баар. Аһынан-үөлүнэн, наадалаах табаарынан уонна ыксаллаах быһыы таҕыстаҕына иһэр уунан хааччыйарга анаан олохтоох урбаанньыты кытта дуогабардастыбыт. Мыраан үрдүгэр иһэр ууну водовозканан хааччыйыахпыт, ону таһынан муус уута, 5 лиитэрэлээх бутилированнай уу саппааһа эмиэ баар.
Биһиги дьоммут сылын аайы сүөһүлэрин эрдэттэн куоттара үөрүйэхтэр. Онон, буоларын курдук, Хоточчуга бааһынай хаһаайыстыбалар 225 төбө ынах сүөһүнү, 250 төбө сылгыны, кэтэх хаһаайыстыбалар 231 төбө ынах, 83 төбө сылгы сүөһүлэрин үрдүк сиргэ таһаарыахтара. Тиит Эбэҕэ бааһынай хаһаайыстыбалар 124 төбө ынах, 27 сылгы сүөһүлэрин, кэтэх ыаллар 43 ынаҕы, 61 сылгыны Аартык диэн үрдүк сиргэ көһөрөн таһаарар былааннаахтар.
Үрдүк уу кэлэр түгэнигэр ыксаллаах быһыы-майгы үөскээтэҕинэ, нэһилиэккэ 10-чалыы киһилээх икки суһал бөлөх баар буолуо. Бу бөлөхтөрү салайар дьон, туһаныахтаах тиэхиньикэлэрэ бигэргэнэн турар, — диэн Лия Геннадьевна үлэни-хамнаһы билиһиннэрдэ.

Бэлэмнэнии төһө да бардар, быйылгы көмүөл уута хоромньута суох этэҥҥэ аастар диэн баҕалаахпыт.

Ольга Гермогенова.