Бу бэлиэ түгэни Строевтар киэҥ аймах көхтөөх киһи Зинаида Шаврина көҕүлээһининэн биир дойдулаахтарыгар бэлэхтээтилэр. Сквер Акулина Строеванан сирэйдээн бары уолаттарын сэриигэ атаарбыт ийэлэргэ ананар диэн эттэ сүдү дьыаланы олоххо киллэрсибит Тиит Арыыга олорор скульптор-худуоһунньук Олег Соловьев.
Үөрүүлээх тэрээһиҥҥэ Батамааайыттан төрүттээхтэр аҕыйах сыллааҕыта бу дьаам ыстаансыйатыгар чочуобуна туруорбуттарыгар курдук көхтөөхтүк кытыннылар. Өлүөнэ өрүскэ уу эбиллэн суолу былдьаан тыраахтыр көрдөһөн таас куттаран, кэтэһэн-манаһан оҥотторон туораан кэлэн Акулина Романовнаны, Ой Мураантан төрүттээх дьоруой ийэни, чиэстээн-бочуоттаан ахтан-санаан аастылар. Тумул олохтоох дьаһалтата култуура үлэһиттэрин кытары кэлэн бэртээхэй паамытынньыктаах сквер чочуобуна аттыгар арылынна.
— Билигин анал байыаннай дьайыыларга ыччаттарбыт эмиэ бараллар. Санааҥ көрүҥ бу дьаам дьахтара ийэ барахсан алта уолу сэриигэ атааран төһөлөөх долгуйбутун, биир уола ханна тиийбитэ биллибэт дьылҕаммытын илдьэ барбытыҥ, эбиитин бэйэтэ холхуоска үлэлээн Кыайыыны уһансыбытын. Сүгүрүйэбит, махтанабыт тулуурдаах, дьулуурдаах ийэлэргэ, — диэн тыллары эттэ «Судаарыстыба дьаамсыктарын сыдьааннара» өрөспүүбүлүкэтээҕи общественнай тэрилтэ салайааччыта Ирина Стрекаловская.
Кини тэрилтэ үрдүкү наҕараадатын бу Батамаайы дьаамын ыстаансыйатын 280 сылынан – «Почетный потомок государевых ямщиков» аатын иҥэрэн, бэлиэни Зинаида Шавринаҕа, Олег Соловьевка, Александр Строевка, Аркадий Ефремовка о.д.а. туттарда.
Өрүү буоларын курдук, ДОСААФ тэрилтэ маннык патриотическай хабааннаах тэрээһиннэргэ бэрэстэбиитэллэрэ кыттан, дириҥ суолталаатылар. Ол курдук, өрөспүүбүлүкэ ДОСААФ салайааччыта Сергей Соболев кэлэн «Биһиги тэрилтэбит 97 сыл ыччаты патриотическай тыыҥҥа иитиигэ, дойду көмүскэлэригэр үлэлээн кэлбитин бэлиэтээн туран Акулина Строева курдук ийэлэри умнумуоҥ, историяны уларытан суруйа сатааччылары этэр-тыынар тылларын саралыы тардыаҕыҥ, кырдьыгы өрө тутуоҕун!» – диэн мустубут дьону ыҥырда. Кини ДОСААФ 95 сылынан мэтээллэри Борис Строевка, Олег Соловьевка, Зинаида Шавринаҕа үөрүүлээх быһыыга-майгыга туттарда. ДОСААФ Хаҥаластааҕы салаатыттан Батамаайыттан төрүттээхтэри, улуус дьону Александр Куприянов эҕэрдэлээтэ, билигин анал дьайыыларга сылдьар уолаттар дойдуларыгар этэҥҥэ өстөөҕү кыайан-хотон эргиллэригэр (ол иһигэр, бу Сергей Соболев уола эмиэ) баҕа санаатын тириэртэ.
Элбэх киһи тыл үтүөтүн патриот дьоҥҥо эттэ, күүс-көмө буолбуттарга Махтар суруктар, бэлэхтэр туттарылыннылар. Ырыа бөҕөтө ылланна, хормуоска, байаан оонньоото. Олус истиҥ тыл, аҕа көлүөнэ дьоҥҥо, Ийэ дойдуну көмүскээччилэргэ этилиннэ, дьиҥнээх норуот бырааһынньыга буолла. Күммүт да туран биэрдэ, Өлүөнэбит очуостара уҥуортан уруйдуу сандаардылар, Эбэ уута наҕылыйан, чуумпуран саллааттар ийэлэригэр сүгүрүйдэ…
Людмила Аммосова.