Саҥа үөрэх дьыла саҕаланара бэрт кыра кэм хаалла. Билии кыһалара саҥардыллан, өрөмүөннэниллэн үлэни саҕалыырга бэлэмнэр.
Үөдэйгэ саҥа оскуола тутуута түмүктэнэрэ эмиэ чугаһаата. Санатан эттэххэ, манна 60 миэстэлээх оскуола тутуута 2021 сыллаахха Тыа сирин кэлимник сайыннарыы бырагырааматынан саҕаламмыта. Эбийиэк 2022 сылга үлэҕэ киириэхтээҕэ, ону кэккэ биричиинэлэринэн болдьоҕо уһаан биэртэ.
4-с Малдьаҕар нэһилиэгин баһылыга Николай Осипов иһитиннэрбитинэн, бу күннэргэ СӨ Бырабыыталыстыбатын бэрэссэдээтэлэ Андрей Тарасенко кыттыылаах мунньахха оскуоланы балаҕан ыйын 10-гар дылы үлэҕэ киллэрэргэ диэн сорудах киирбит.
— Оскуолабыт тутуутун бэдэрээччит «Веста» ХЭТ (сал. Иннокентий Аммосов) ыытар. Бу нэдиэлэҕэ оскуола тиэргэнин бетоннаан бүтэриэхтэрэ. Билигин таһырдьааҥҥы оҕо спортивнай былаһаакката оҥоһуллар. Ис өттүгэр кыра электрика үлэтэ, спортивнай саалаҕа инвентары таҥыы-туруоруу ыытыллар. Ону сэргэ септиктары бэрэбиэркэлиэхтэрэ, көҕөрдүү үлэтэ барыахтаах.
Саҥа оскуолабыт саҥа үөрэх дьылыгар арылларын нэһилиэк дьоно-сэргэтэ бары долгуйа күүтэбит. Оскуолабыт тиэргэнин ис-тас өттүн ыраастааһыҥҥа уопсай субуотунньугу үһүс төгүлүн тэрийдибит. Олохтоохтор куруук олус көхтөөхтүк кыттыһаллар. Бу да сырыыга бэйэлэрин кэтэх тиэхиньикэлэринэн бөҕү тиэйсэн улаханнык көмөлөстүлэр, — диэтэ баһылык Николай Николаевич.
Бэлиэтээн эттэххэ, 1395 кв. м иэннээх оскуола саҥа дьиэтигэр начаалынай кылаастарга туһунан блоктаах, улахан кылаастарга анаммыт лабораторнай үлэни ыытарга тус-туһунан физика, химия кабинеттара, кыргыттарга иистэнэр массыыналарынан, уолаттарга уһанар тэрилинэн хааччыллыбыт үлэ уруогун кабинеттара, компьютернай кылаастар, бибилэтиэкэ, остолобуой, душевойдаах спортсаала баар.
Ольга Гермогенова.