Юрий Герасимович Сергеев 1941 сыллаахха тохсунньу 22 күнүгэр Ньурбаҕа төрөөбүтэ. Кросска ССРС спордун маастарыгар кандидат, чэпчэки атлетикаҕа РФ уонна СӨ спордун бэтэрээнэ, СӨ педагогическай үлэ туйгуна, СӨ физическэй культура уонна спордун туйгуна. Манчаары Баһылай бирииһигэр чэпчэки атлетикаҕа алта төгүллээх кыайыылаах аатын ылбыта, Москва куорат ССРС бэтэрээннэрин чэпчэки атлетика бастакы күрэхтэһиилэригэр кыттыбыта. Бэтэрээннэргэ Россия чемпионатыгар 800 м уһуҥҥа иккис миэстэлээх (1992 сылга Краснодар куоракка), Королев куоракка ыытыллыбыт кросс кыттыылааҕа (2003 с.), 10000 м дистанцияҕа Саха АССР рекордсмена этэ.
Хамсаныы биир сүрүн көрүҥүгэр –сүүрүүгэ былыр-былыргыттан улахан суолта бэриллибитин туоһулуур өйдөбүнньүгүнэн Эллада үрдүк таас хайатыгар суруллубут сурук буолар:
«Күүстээх буолуоххун баҕардаххына – сүүр,
Кэрэ дьүһүннэниэххин баҕардаххына – сүүр,
Өйдөөх буолуоххун баҕарар буоллаххына – сүүр».
Юрий Сергеев Герасим Петрович уонна Анастасия Ефимовна элбэх оҕолоох дьиэ кэргэнигэр уон биирис оҕонон күн сирин көрбүтэ. Уол Ньурбатааҕы 1 N-дээх оскуоланы бүтэрэр. Энтузиаст физкультура учууталлара Афанасий Саввинов, Николай Васильев, Григорий Чумпуров – киниэхэ бастакы педагогтара. Оскуолаҕа сылдьан көҥүл тустуунан, баскетболунан, сүүрүүнэн үлүһүйэн туран дьарыктаммыта. Ордук футболу, гимнастиканы сөбүлээбитэ.
1961 сылтан үс сыл Юрий Сергеев Советскай Союз Бойобуой Кыһыл Знамя уордьаннаах Чуумпу акыйааннааҕы Байыаннай Флотугар “Эскэ” кылаастаах дизельнэй подводнай лодкаларга сулууспалаабыта. Подводниктар сулууспаларын сүрүн сыалынан уу аннынан сылдьар сүдү оҥоччону акыйаан ханнык баҕарар туочукатыгар хаһан баҕарар үрдүкү командование бойобуой сорудаҕын толорорго бэлэмнээһин буолар. Ол инниттэн оборудованиелар механизмнара, техника куруук бэлэм буоларын хааччыйар үлэ тиһигин быспакка ыыталлар, экипаһы ол соругу ситиһэр үөрүйэхтэргэ үөрэтэллэр. Араас таһымнаах экзаменнары туттараллар, бойобуой дьуһуурустубаларга тахсаллар, хараабыл тимирбэтин туһугар түбүгүрэллэр.
“Походтар кэмнэригэр хараабыл офицердара, матростар бэйэ бодолорун тардынан сулууспаларыгар олус эппиэтинэстээхтик сыһыаннаһаллар, бойобуой вахталарга тураллар. Бу матростар бэлэмнэриттэн хараабыл дьылҕата тутулуктанар. Походтарга уһуннук устуу хас биирдии моряктан улахан тулууру, үрдүк таһымнаах байыаннай уонна муораҕа сылдьыы үөрүйэҕин эрэйэр. Сулууспалаабыт уу аннынан сылдьар оҥочолорбут дизельнэй буоланнар, түүн аайы уу үрдүгэр дагдайан тахсан дизеллэри аккумуляторынан иитэр этибит. Ол түгэни, хаһан түүн үөһэ буолан, подводнай лодка уу үрдүгэр тахсарын тулуйбакка-тэһийбэккэ кэтэһэрбит, муора сибиэһэй салгынынан үрдэрдэхтэринэ эрчимирэ түһэрбит. Түүн аайы хас көрсөр судноларгыттан, көтөн ааһар самолеттартан саһан, суһаллык уу түгэҕэр түһэрбит. Автономкалар кэмнэригэр хас биирдии офицер, матрос ньиэрбэтэ куруук тыҥаан сылдьарынан олус сэргэх буолаҕын, бэл, утуйа да сытан прибордаргын эккинэн-хааҥҥынан көрөр, билэр курдук буолаҕын.
Подводнай оҥочо иһэ олус тымныйар, мэлдьи тоҥо сылдьаҕын. Үс сыллаах сулууспа кэмигэр, көрдөөх да түгэннэр элбэх буолаллара. Старшина званиетын ылбытым. Сулууспабыт бүппүтүн да иһин өрүү умнубаппын, ураты сылаастык саныыбын”, – диэн кэпсээн турардаах Юрий.
Сулууспатын кэнниттэн Юрий Сергеев Ньурба авиа-этэрээтигэр моториһынан үлэлээбитэ. 1968-1972 сылларга Хабаровскайга физкультурнай институту бүтэрбитэ. 1972-1979 сс. Үөһээ Бүлүүтээҕи И. Барахов аатынан оскуолаҕа физкультура учууталынан үлэлии сылдьар кэмигэр спорт уонна физкультура бэркэ сайдан испитэ. Дьарыктаабыт үөрэнээччилэрэ улуус, Бүлүү зонатын, өрөспүүбүлүкэ чөмпүйүөннэринэн, призердарынан буолуталаабыттара. Кинилэртэн ордук ситиһиилээхтэринэн Гоша Яковлев, Оля Кужнурова, Сережа Цыбулькин, Витя Жаров, Таня Севастьянова, Таня Данилова, Аня Ислахова, Вася Попов, спортивнай хаамыыга Витя Новиков, ГТО нуорматын туттарыы многоборье көрүнүгэр Боря Лопухин буолбуттара. Кэккэ сылларга Юрий Сергеев Покровскайга оскуолаҕа үлэлээбитэ, ыччаты спортка уһуйбута.
Быйыл ыам ыйын 7 күнүгэр Юрий Сергеев сырдык кэриэһигэр бастакы өрөспүүбүлүкэтээҕи чэпчэки атлетикаҕа “Эркээни Хочото-2023” күрэ5э ыытыллыбыта. Онно барыта Сахабыт сирин 8 улуустарыттан 16 бөлөҕүнэн 68 спортсмен кыттыбыта. Күрэххэ абсолютнай чөмпүйүөннэринэн Леонид Зыков ( Хаҥалас) уонна Полина Слободчикова (Сунтаар) буолбуттара.
Юрий Сергеев улаханнык сааһырбакка сылдьан, ыарахан ыарыыттан 2016 сыллаахха олохтон туораабыта. Билиҥҥи уонна кэлэр да көлүөнэ ыччат талааннаах спортсмен, ыччат лидера Юрий Сергеев курдук үтүө үлэһит, көрсүө — сэмэй киһи олоҕун холобур оҥостуохтара, кини аатынан киэн туттуохтара, оччоҕо бар дьон амарахтык ахтар ыччаттара тахсыахтара диэн эрэниэҕи баҕарыллар.
Василий Можуков, СӨ спордун маастара, СӨ спордун бэтэрээнэ, Покровскай к.