Хаҥалас хаһыатыгар өр сылларга үлэлээн-хамсаан үтүө өйдөбүлү хаалларбыт, улуус социальнай-экономическай сайдыытыгар дьоһун кылааты киллэрбит суруналыыстар Афанасий Яковлев аатынан суруйан холонор үөрэнээччилэргэ уонна Михаил Дьячковскайы үйэтитэн суруналыыстарга, общественнай кэрэспэдьиэннэргэ «Хаҥалас улууһа» муниципальнай оройуон дьаһалтата Россия Бэчээтин күнүгэр бириэмийэ туттарбыта сүүрбэттэн тахса сыл буолла (быйылгыттан өссө улууһу социальнай ситимҥэ сырдатар блогердарга, пресс-кииннэр үлэһиттэргэ). Сэрэдэ күн дьаһалта дьиэтигэр Хаҥаласпыт аатын-суолун ааттата суруйар дьоммутун түмэр үөрүүлээх түгэн үүннэ.
Михаил Дьячковскай тарбахха баттанар суруналыыс, тылбаасчыт, лектор этэ
Кини 1982-1989 сылларга улууспут хаһыатын редакторынан үлэлээбитэ, «Ханидо уонна Халерхаа»курдук Семен Курилов сүдү айымньыларын сахалыы тылынан саҥардыбыт талааннаах тылбаасчыт, өрөспүүбүлүкэҕэ биллэр «Знание» общество лектора этэ. М.Д. Дьячковскай аатынан общественнай-политическай суолталаах суруйууларга бириэмийэни улуус дьаһалтата 2001 сылтан туттарар.
Бэчээт күнүнэн мустубут дьону эҕэрдэлээн туран бириэмийэни улуус баһылыгын бастакы солб. Гаврил Алексеев Покровскай 1 №-дээх оскуолатын педагог-бибилэтиэкэригэр, Россия суруналыыстарын Сойууһун чилиэнигэр, «Суруналыыстыка Академията» эдэр корреспонденнарын куруһуогунүн салайааччытыгар Сардаана Кириллинаҕа туттарда.
Оҕолору суруйууга көҕүлээн
Онтон Афанасий Яковлев I-Дьөппөнтөн төрүттээх эмиэ өрөспүүбүлүкэҕэ биллэр суруналыыс этэ. Өр сыл улууспут хаһыатыгар үлэлээбитэ, сэттэ кинигэ ааптара этэ, ол иһигэр Мохсоҕоллоохтооҕу цемент, Покровскайдааҕы кирпииччэ собуотун историятыттан, оройуоммут, Грузинскай ССР Орджоникидзевскай оройуонун кытары сибээһи олохтообут дьоһун киһи. Кини аатынан оҕолорго бириэмийэ 1997 сылтан туттарыллан кэллэ!
2023 сыл түмүгүнэн А.М. Яковлев аатынан бириэмийэ дипломун, харчы сертификатын I Дьөппөн санаторнай интернат-оскуолатын үөрэнээччитигэр Дмитрий Шестаковка Г.Ю. Алексеев туттарда.
Афанасий Михайлович аатынан бириэмийэ лауреаттарынан бу сүүрбэттэн тахса сыл ааттаммыт ыччаттар үксүлэрэ суруналыыстыканы кытары олохторун сибээстээтилэр, ол курдук Евгения Арьянова (Петрова), Марина Трофимова о.д.а. бу эйгэҕэ үлэлии сылдьаллар.
Үтүө үгэһинэн Яковлевтар дьиэ кэргэттэрин ыччаттарга ботуччу бириэмийэтин уонна дипломнарын нууччалыы, сахалыы тыллаах хаһыаттарбытын кытары утумнаахтык үлэлэһэр, бастыҥ эдэр кэрэспэдьиэннэр постарыгар туттараллар.
2023 сыл бастыҥнарынан элбэх, дьоһун суруйуулардаах И.М. Яковлев аатынан Покровскай 1 №-дээх орто оскуолатын «Ыллык» (сал. Л.М. Горохова), «Суруналыыстыка Академията» (сал. С.А. Кириллина) постарыгар уонна М.Е. Васильева аатынан 2-Малдьаҕар орто оскуолатын Медия-пресс киинигэр (сал. Н.П. Громова) Яковлев А.М. кыыһа Гера Шишигина туттарда.
Эрэли кытары
Бу күн улуус дьаһалтатын аатыттан наҕараадалары общественнай кэрэспэдьиэннэр Ермолай Скрябин, Александра Алексеева, редакцияттан суруналыыстар Валентина Хайритдинова, Мария Васильева, компьютернай таҥыы оператора Виктория Иванова, «Хаҥалас» ТВ үлэһиттэрэ Виолетта Засимова, Иван Уйгуров, Федор Тарасов туттулар. Улуус Мунньаҕын аатыттан бэрэссэдээтэл Анатолий Антонов суруналыыстары Айталина Яковлеваны, Людмила Аммосованы, Ольга Гермогенованы, социальнай ситимнэргэ үлэлиир шеф-редакторы Наталья Григорьеваны, рекламаҕа менеджер Вита Протодьяконованынаҕараадаларынан бэлиэтээтэ.
Редакция дьаһалталарга сурутууга кыттыыга биллэрбит куонкуруһа түмүктэннэ
Бастакы миэстэни «Хачыкаат нэһилиэгэ» МТ (баһылык Оболкина И.В.) ылла, дипломунан уонна хаһыакка сыллааҕы сурутуунан, дьаһалта үлэтин, нэһилиэк олоҕун сырдатыыга сертификатынан бэлиэтэннэ.
Иккискэ «Бэстээх нэһилиэгэ» МТ (баһылык Делец Е.В.) таҕыста, диплом тутта, сурутуу ылар буолла – МО бүддьүөтүн отчуотун хаһыакка босхо бэчээттииргэ сертификаттанна.
Үһүс миэстэни олоххо көхтөөх «Дьэр нэһилиэгэ» МТ дьаһалтата ылан дипломунан, сыллааҕы сурутууну уонна дьаһалтаттан социальнай ситимнэргэ үлэлииргэүөрүйэхтэргэ исписэлииһи босхо үөрэтиигэ сертификаты тутта.
«Үлэ дьоно» күрэх түмүктэннэ
Ону сэргэ Үлэ сылынан биллэриллибит «Үлэ дьоно» айар күрэх түмүгэ таҕыста, дипломнары, анал бириэмийэлэри туттарыы буолла.
Түмүккэ Хаҥаласка Дьиэ кэргэн уонна оҕо-аймах сыла үүммүтүнэн мунньах кыттыылаахтарыгар, общественниктарга «төгүрүк остуол» буолла.
Людмила Аммосова.