Өлүөнэ Очуостарыгар хайыһар күрэҕэр «Азия оҕолоро» оонньууларын уоттара саҕыллар күнүгэр Лабыдьа үрэҕин хомотугар СӨ хайыһар спордугар, ону сэргэ хайыһарга уонна чэбдигирдэр хаамыыларга федерациялара өтөрүнэн буолбатах күрэхтэһиини тэрийэн ыыттылар. Манна араас кэмҥэ бу спортивнай оонньуулар кыайыылаахтарын, ол иһигэр Леонид Спиридонов, Гаврил Цыпандин, Прокопий Петров, Виктор Лебедев, Кристина Тимофеева о.д.а, ааттарынан мэтээллэр, федерациялар грамоталара бастыҥнарга туттарылыннылар.
Күрэхтэһиигэ Уус Алдантан, Мэҥэ Хаҥаластан, Хаҥаластан, Намтан о.д.а.улуустартан, Дьокуускайтан кэлэн кытыннылар. Кылаабынай судьуйанан спорт бэтэрээнэ Николай Платонов үлэлээтэ, — диэн кэпсээтэ спорт энтузиаһа Георгий Самсонов. — Ол курдук, 3 км дистанцияҕа бэтэрээннэргэ ( 1984 с.т. үөһээ саастаахтарга) бэтэрээннэр сүүрдүлэр. Манна дьахталларга үчүгэй көрдөрүүнү Дьокуускайтан Мария Бандерова, 1989 с.т. онтон үөһээ саастаахтарга 2 км дистанцияҕа ситистэ. 1 км дистанцияҕа 2011-2012 с.т. кыргыттар сүүрдүлэр. Манна Мэҥэ Хаҥаластан Алина Терентьева бастаата, уолаттарга Дамир Тоноев Дьокуускайтан тэҥнээҕин булбата. 3 км эр дьоҥҥо 1985-2005 с.т. Николай Копырин Уус Алдантан биэтэккэ бастакынан кэллэ. 1990-2005 с.т. дьахталларга Альберта Алексеева бастаата. Бу дистанцияҕа алта киһи сүүрдэ. 2013-2014 с.т. 500 м уһуҥҥа кыргыттарга Намтан Виктория Стручкова, уолаттарга Вадим Огушкаев Мэҥэ Хаҥаластан бастаатылар. Барыта 13-14 оҕо кытынна, ол иһигэр Хаҥаластан — Сиинэттэн, Тумултан, Чкаловтан оҕолор кэлэн көх-нэм буолан кыахтарын тургутустулар. 2009-2010 с.т. оҕолорго 2 км бэрт сүүрүүнү Ангелина Корнилова, 7 №-дээх оҕо спортивнай оскуолатын иитиллээччитэ, уолаттарга Дамир Колесов Ньурбаттан көрдөрдүлэр. 1989 с.т. уонна үөһээ саастаахтарга 2 км бэтэрээннэр бэркэ сүүрдүлэр. Мария Бандерова бу дистанцияҕа бастаата.
Кыайыылаахтары сэргэ иккис-үһүс миэстэлэспиттэр эмиэ туһааннаах наҕараадалары туттулар. Бу күн тыраасса уустук соҕус да буоллар, спортсменнарбыт кыахтарынан сүүрдүлэр. Хайыһардьыттарбыт «Азия оҕолоро» оонньууларын уоттарын уматыыны, хоккеистар аан дойду чемпионнарын хамаандатын кытары Очуостарбыт анныларыгар бастакы оҥоһуллубут кортка күрэхтэспиттэрин көрөн, сибиэһэй салгыҥҥа сылдьан астыннылар, — диэтэ хайыһардьыт, милиция бэтэрээнэ.
Людмила Мордовская.
Сергей Киров хаартыскаҕа түһэриилэрэ.