Кулун тутар 31 күнүгэр Хаҥалас улууһун Булгунньахтаах сэлиэнньэтин Арчы дьиэтигэр Саха өрөспүүбүлүкэтин туйгуна, үтүөлээх оһуокайдьыта Тимофей Давыдов 60 сааһыгар аналлаах В.Г.Григорьев аатынан “Дьиэрэй, ырыа” култуура киинин үлэһиттэрэ үөрэммит оскуолалара 125 сылыгар анаан нэһилиэктэригэр оһуокай күнүн тэрийдилэр. Дьоро киэһэни Анисия Дъяконова салайааччылаах “Сарыада” итэҕэл түмсүүтэ арчылаан, алаадьылаах кымыһынан айах тутан арыйда.
Бу күн Дмитрий Лаврентьев, нэһилиэк баһылыгын солбуйааччыта, Александр Тимофеев, оскуола дириэктэрэ, бииргэ үөрэммит табаарыһа, Тимофей бииргэ төрөөбүт убайа Николай Давыдов, олоҕун аргыһа Ирина, аймахтара — Сунтаар улууһуттан төрүттээх СӨ култууратын туйгуна, үтүөлээх оһуокайдьыта, култуура мецената, норуот эмчитэ Антонина Алексеева уонна “Розтор” сетевой маҕаһыынын салайааччыта Михаил Иванов, СӨ култууратын үтүөлээх үлэһиттэрэ “Эркээни эдэр сааһа” народнай үҥкүү кэлэктиибин салайааччыта, Хаҥалас оһуокайын тарҕатааччы, көҕүлээччи, Тимофей Давыдов тастыҥ эдьиийэ Василиса Романова, Хаҥалас улууһун “Арчы дьиэтэ” норуот айымньытын киинин уонна Хаҥалас оһуокайдьыттарын түмсүүтүн салайааччыта Лидия Харитонова эҕэрдэ тылы эттилэр.
Хаҥаластыы, таатталыы, аммалыы оһуокайы Сергей Макаров, бэйиэт, мелодист, ОДьХХ үлэһитэ, Анна Черосова, саха тылын учуутала, Александр Тимофеев, оскуола дириэктэрэ, Лия Давыдова, элбэх оҕолоох Тимофей Давыдов кийиитэ, Алина Михайлова, дьаһалта исписэлииһэ, оһуокай түмсүүтүн салайааччыта, Тимофей Давыдов кыра уола Ньургун Давыдов, “Дьиэрэй ырыа”култуура киинин исписэлииһэ таһаардылар. Тэрээһини иилээн-саҕалаан ыытта СӨ култууратын туйгуна “Дьиэрэй ырыа” култуура киинин уус-уран салайааччыта, Тимофей олоҕун аргыһа Ирина Давыдова.
Тэрээһиҥҥэ кыттыбыт дьон бары оһуокайдаан көхсүлэрэ кэҥээн тарҕастылар, оһуокай кыттыылаахтарыгар статуеткалары, махтал суруктары туттардылар.
Лидия Харитонова.