Бу күннэргэ биһиэхэ, Хаандыгаҕа, биллиилээх хомусчут Спиридон Шишигин ыҥырыытынан Германияттан Аан дойду хомусчуттарын уопсастыбаларын бырабылыанньатын чилиэнэ, музыкант Сөрен Бирке уонна кини кэргэнэ диджей Марейке ыалдьыттаатылар. Бөлөх салайааччыта Европаҕа олохсуйан олорор биир дойдулаахпыт Мария Шишигина-Палссон. Кинини Саха сирин диаспоратыгар биир актыыбынай тэрийээччинэн, саха култууратын Европа омуктарыгар билиһиннэрээччинэн, ол инниттэн араас анал тэрээһиннэри иилиир-саҕалыыр киһинэн билэбит. Мария саха хомуһа атын омуктар искусстволарын, музыкаларын кытта дьүөрэлэһэн сайдарын туһугар сыал-сорук туруорунан үлэлиир. Сөрен Бирке Томпо улууһугар тас дойдуттан ыалдьыттаабыт бастакы хомусчут.
Ыалдьыттар Дьокуускай-Таатта-Томпо-Өймөкөөн маршрутунан сылдьан кэнсиэрдэргэ кытыннылар, хомусчуттары кытта көрүстүлэр, элбэх музейдарга сырыттылар, Саха сирин айылҕатын астына-дуоһуйа, сөҕө-махтайа көрдүлэр, сынньаннылар.
Хаандыгаҕа оҕо искусствотын оскуолатыгар сүрдээх истиҥ көрсүһүү буолан ааста. Иитиллээччилэр хомуска сатабыллаахтык оонньоон ыалдьыттар биһирэбиллэрин ыллылар. Өрөспүүбүлүкэ, улуус таһымнаах күрэстэр кыайыылаахтара Диана Афанасьева (сал. Захарова В.С.), Дарья Зудина (сал. Охлопкова Л.В.), «Туллукчаан” хомусчуттар ансаамбыллара (сал. Захарова В.С.) төрүт дорҕоону утумнааччылар буолалларын көрдөрдүлэр. Уһуйааччылар Надежда Вилкова, Владимир Конков, Вероника Захарова, Алина Федорова, Любовь Охлопкова, үҥкүүһүттэр бөлөхтөрө (сал. Аянитова П.Е.) кэнсиэри ситэрэн-хоторон биэрдилэр.
Түмүккэ ыалдьыппыт Сөрен Бирке бэйэтин национальнай инструменыгар — уос хормуоскатыгар оонньоон, саха хомуһун тардан оҕолор, учууталлар улахан сэҥээриилэрин ылла. Аны хаһан да тыыннаахтыы истибэтэх армян норуотун дудук диэн музыкальнай тэрилигэр оонньоон соһутта да, үөртэ даҕаны. Инньэ гынан оҕолорго умнуллубат бэртээхэй көрсүһүү буолан ааста.
Сөрен Бирке дудук музыкатын үөрэтээри, чинчийээри элбэхтик Арменияҕа сылдьыбыт, кэнсиэрдэргэ, күрэстэргэ кыттыбыт, документальнай киинэ устубут эбит. Аан бастаан дудугу Берлиҥҥэ “Гладиатор” диэн киинэҕэ истэн сөбүлээн, Арменияҕа тиийэн үөрэнэн аан дойдуга биллэр, дьон-сэргэ сүгүрүйэр бастыҥ дудукка толорооччунан буолбут.
Аны билигин хомуһу дириҥник чинчийэр былааннаах. Сөрен Бирке отучча сыллааҕыта Спиридон Шишигин хомуска оонньуурун истэн хомуһунан үлүһүйбүтүм диэн кэпсиир. Сотору саха хомуһун туһунан документальнай киинэ уста кэлээри былаанныыр.
Лидия Борисова, хомусчут, СӨ култууратын үтүөлээх үлэһитэ, Хаандыга.