П.С. Скрябин аатынан 1-кы Дьөппөн орто оскуолатын үөрэнээччилэрэ, учууталлара быйылгы үөрэх дьылын түмүктүүр тэрээһиннэрин «Сарыал» Култуура киинигэр ыыттылар, кэнсиэр, дьаарбаҥка, оҕолор уруһуйдарын быыстапката тэрилиннэ.
Бу үөрэх сылыгар оҕолор ылбыт билиилэрин-көрүүлэрин, сатабылларын киэҥ эйгэҕэ таһааран оскуолаларын, нэһилиэктэрин, улуустарын, өрөспүүбүлүкэ чиэһин көмүскээн, дипломан, лауреат, чемпион аатын сүктүлэр.
«Сулустар түһүлгэлэрэ» күрэх түмүгүнэн үөрэнээччилэр сыллааҕы ситиһиилэринэн анал номинациялары туттулар. Ол курдук, «Сыл бастыҥ спортсмена» ааты 3 кылаас үөрэнээччитэ Айлаана Очиржапова уонна 6 кылаас үөрэнээччитэ Милана Скрябина ыллылар. «Сыл бастыҥ ааҕааччыта» анал ааты СӨ үөрэҕириитин туйгуна, оскуола бибилэтиэкэрэ Мария Михайлова 6 кылаас үөрэнээччитигэр Айсена Борисоваҕа туттарда. «Сыл бастыҥ олимпиаднигынан» 3 кылаас үөрэнээччитэ Настя Николаева, 10 кылаастан Анджелика Кирикова ааттаннылар. Кыргыттарга анал ааты СӨ үөрэҕириитин туйгуна София Прокопьева туттарда. «Биир да күн оскуолата суох» анал аат 5 кылаас үөрэнээччитигэр Тимофей Адамовка тигистэ. «Сыл бастыҥ талаана» номинацияны «Ритм» куруһуок салайааччыта, физкультура учуутала Ньургуйаана Амбросьева 10 кылаас үөрэнээччитигэр Амелия Яковлеваҕа туттарда. «Оскуола чиэһэ» үрдүк аат 4 кылаас үөрэнээччитигэр Эдик Теплоуховка иҥэрилиннэ. «Бастыҥ үөрэнээччи» анал ааты оскуола дириэктэрэ Николай Гоголев 6 кылаас үөрэнээччитигэр Санаайа Очиржаповаҕа туттарда.
Бу күн уолаттар төрөөбүт тылларынан дорҕоонноохтук хоһоон аахтылар. «Хаҥалас сулусчааннара» күрэххэ Гран-При аатын ылбыт «Ритм» үҥкүү бөлөҕө индийскэй, аныгы үҥкүүнү толордулар. «Ийэ тыл этигэн кэрэтэ» улуустааҕы бэстибээлгэ «Тыйаатыр эйгэтэ» түһүмэххэ бастыҥ ааты ылбыт театр студиятын туруоруутугар Эрилик Эристиин «Хачыгыр» айымньытыттан быһа тардан оҕолор бэркэ оонньоотулар (салайааччылар Мария Михайлова, Жанна Константинова). «Хаарчаана» мода театрын кыргыттара (салайааччы Мария Филиппова) сахалыы стилизованнай таҥас көрдөрдүлэр. Бу мода куруһуога 10-с сылын ситиһиилээхтик үлэлиир. Сонун нүөмэри художественнай гимнастиканан дьарыктанар имигэс кыргыттарбыт Виолетта Протодьяконова, Айлаана Очиржапова уонна Элина Теплоухова көрдөрдүлэр. Кэнсиэргэ оҕолорбут талааннарын сөҕө-махтайа көрдүбүт. Тэрээһин түмүгэр өрөспүүбүлүкэтээҕи «Күн оһуокайа» күрэх кыттыылааҕа Амелия Яковлева оһуокай таһааран бу дьоро киэһэ кыттыылаахтара, көрөөччүлэрэ оһуокайдаан эргийдибит.
Анастасия Мордовская, Тиит Эбэ с.