Бу күннэргэ саха төрүт спордун көрүҥүн сэҥээрээччилэргэ анаан Өктөм нэһилиэгэр, П.И. Шадрин аатынан Өктөм орто оскуолатын спортивнай былаһааккатыгар, эр дьон, дьахталлар уонна бэтэрээннэр истэригэр өрөспүүбүлүкэбит киэн туттар спортсмена, Саха АССР ыстаҥаҕа спордун маастара, СӨ бочуоттаах тутааччыта, Саха сирин норуоттарын IX уонна X икки төгүллээх абсолютнай чөмпүйүөнэ, Баһылай Манчаары бирииһигэр спартакиада үстөгүллээх чөмпүйүөнэ Василий Николаев кэриэһигэр өрөспүүбүлүкэтээҕи ыстаҥаҕа чемпионат ыытылынна.
Тэрийээччилэр өрөспүүбүлүкэтээҕи Баһылай Манчаары аатынан спорт национальнай көрүҥнэрин киинэ, СӨ ыстаҥаҕа федерацията уонна Хаҥалас улууһун спорткауонна физическай култуураҕа управлениета. Бу күн туох баар кылыы, ыстаҥа, куобах көрүҥнэрин сулустара Өктөм нэһилиэгэр күөн көрүстүлэр.
Василий Васильевич 60-с сылларга спринтерскай дистанцияҕа сүүрүүгэ хаста да рекодсменнаабыта, ол кэмҥэ олус үрдүк көрдөрүүлэри көрдөрбүт киһинэн биллэр, — диэн күрэхтэһии сүрүн судьуйата Максим Оегостуров кэпсээтэ.
Күрэхтэһии түмүгүнэн кыргыттарга Хаҥалас улууһуттан СӨ спордун маастара Валерия Олесова I миэстэҕэ, Мэҥэ Хаҥалас улууһуттан спорт маастарыгар хандьыдаат Анна Лыткина II миэстэҕэ уонна Нам улууһуттан эмиэ спорт маастарыгар хандьыдаат Ангелина Иванова III миэстэҕэ таҕыстылар.
35-45 саастаах бэтэрээн эр дьоннор истэригэр Хаҥалас улууһуттан Еремей Ильин бастаата, Чурапчы улууһуттан Андрей Софронов II миэстэ буолла уонна Нам улууһуттан Максим Софронов III миэстэҕэ тигистэ.
50 саастарыттан үөһэ бэтэрээн эр дьоҥҥо Уус Алдан улууһуттан Андрей Бочкарев I миэстэни, Үөһээ БүлүүттэнВасилий Санников II миэстэни уонна Чурапчы улууһуттан Афанасий Дорофеев III миэстэни ыллылар. Манна барыта 6 киһи күөн көрсүбүтэ.
Онтон саамай тыҥааһыннаах киирсиигэ, эр дьоннорго, СӨ спордун маастара Уус Алдан улууһуттан Ньургун Сокольников кыайыылаах таҕыста. II миэстэни Горнай улууһуттан Кай Адамов ылла уонна III-с Таатта улууһуттан Андрей Васильев буолла.
Инникитин Анатолий Добрянцев сырдык кириэһигэр анаммыт сахалыы национальнай ыстаныыларга II-с Өрөспүүбүлүкэтээҕи аһаҕас турнир ыытылларын күүтэбит.
Татьяна Владимирова.