Дьокуускай куоракка оҕолор стендовай ытыынан 2016 сылтан утумнаахтык дьарыктаналлар.
«Азия оҕолоро» VIII спортивнай оонньууларга стендовай ытыыга күрэхтэһии түмүгүнэн, өрөспүүбүлүкэ сүүмэрдэммит хамаандатыгар киирбит Өктөм орто оскуолатын 9 «б» кылааһын үөрэнээччитэ Саян Константинов «Скит» көрүҥҥэ кыһыл көмүс мэтээли ылла. Кинилиин тэҥҥэ Дьокуускай куораттан Амилия Сидельникова эмиэ кыһыл көмүс мэтээл хаһаайката буолла. Оҕолор иккиэн Өктөм нэһилиэгиттэн сылдьар тириэньэргэ Аркадий Андреевка дьарыктаналлар.
Улахан күрэхтэһиигэ дьоһун ситиһиилэммит Саян Константиновынан улууһун, нэһилиэгин дьоно киэн тутталлар. Бэргэнник ытыы албастарыгар Саян кыра эрдэҕиттэн аҕатын, убайын кытта булка-алка сылдьыһан үөрэммит. Оттон стендовай ытыынан кини 12 сааһыттан биир дойдулааҕар Аркадий Андреевка дьарыктанан саҕалаабыт.
— Бу спорт көрүҥэ туруоруммут сыалы ситиһэргэ көмөлөһөр, тулуурдаах буоларга үөрэтэр, уйулҕабын уоскутар. Саха сирин кыһына уһун, сайына кылгас буолан дьарыктанарга харгыстардаах. Мантан сиэттэрэн биһиги атын куораттарга күрэхтэһиилэргэ элбэхтик сылдьан уопутурабыт. Быйылгы «Азия оҕолоругар» кыттаары биир сыл күүскэ дьарыктаммыппыт. Биллэн туран, миэхэ спордунан утумнаахтык дьарыктанарбар бигэ тирэҕим, эрэнэр эркиним ийэм, аҕам, бииргэ төрөөбүттэрим уонна тириэньэрим буолаллар. Онон бу кыайыыбын кинилэргэ аныыбын.
Мин бу Оонньууларга кыттан өссө элбэх саҥа доҕоттордоннум. Ол курдук, Новосибирскайтан уонна Екатеринбургтан сылдьар тэҥҥэ күрэхтэспит уолаттарбын кытта билистим. Биһиги бары бииргэ оонньуулар арыллыытыгар уонна түмүктэниитигэр сылдьыбыппыт, олус астынныбыт, барыта үрдүк таһымҥа ыытылынна. Сотору Москва куоракка «Лига юниоров», Азия чемпионатыгар уонна да атын күрэхтэһиилэргэ кытта барыахтаахпыт, – диэн «Азия оҕолоро» VIII спортивнай оонньуулар кыайыылаахтара Саян үөрэ-көтө кэпсээтэ.
Саян Константинов спортсмен эрэ быһыытынан ситиһиилээх буолбатах, оскуолатыгар, кылааһыгар билиини-көрүүнү үрдүктүк тутар үөрэнээччи. Онон киниэхэ инникитин үгүс ситиһиилэри, элбэх кыайыылары баҕарабын.
Саха сирин хамаандата стендовай ытыыга үчүгэй бэлэмнээҕин көрдөрдө. 4 күн устата ыытыллыбыт күрэххэ биһиги оҕолорбут биирдиилээн ытыыга 4 кыһыл көмүс, 3 үрүҥ көмүс, 2 боруонса мэтээли ыллылар. Хамаанданан ытыыга 1 кыһыл көмүс, 1 үрүҥ көмүс, 2 боруонса мэтээл хаһаайыннарынан буоллулар. Эрийсиилээх күрэххэ сахалар бэргэн ытааччы буолалларын өссө төгүл туоһулаатылар.
Татьяна Владимирова.