Кыстыгы көрсө
Бу кыра сэлиэнньэ 72 ыал дьиэлэрин, социальнай суолталаах тэрилтэлэрин сылааһынан хааччыйар кыахтаах, үлэлии турбут түөрт дьоҕус хочуолунайы солбуйар соруктаах дьоһун тутуу буолар. Ититэр ситим улахан гаражка тиийэ тардыллыахтаах. Кыстыгы көрсө былдьаһыктаах күннэргэ үлэ хаамыытын туһунан биһиэхэ 5-Малдьаҕар муниципальнай тэриллиитин баһылыга Николай Осипов билиһиннэрдэ.
— Олохтоохтор өр сылларга араас таһымнаах мунньахтарга туруорсан-туруорсан быйыл өрөспүүбүлүкэ инвест-бырайыагынан хочуолунайбыт тутуллар буолбута, — кэпсиир Николай Петрович. — Харчы көрүллэн кыһыҥҥы суолунан саас тутуу матырыйаала барыта аҕалыллыбыта. Былаһаакката эрдэттэн бэлэмнэниллэн билигин тимиринэн хочуолунай дьардьаматын тимирдэрин холбоон иһэрдэнбэлэмнии сылдьаллар. Бу күннэргэ сүүрбэччэ киһилээх биригээдэ кэлэн үлэ салҕаныаҕа, эркиннэрэ сендвич-панелынан тахсыахтара. Онтон ититэр ситим магистральнай тыраассатын тутуу үлэтэ бара турар. Хочуоллары, емкостары, трансорфматордары туруоруу, таҥыы, уокка-күөскэ холбонуу үлэтэ ыытыллыа. “СахаРесурс” ХЭТ тэрилтэ тутууну ыытар. Бэдэрээттэһэр тэрилтэ үлэһиттэрэ турбалары эбийиэктэргэ, олорор дьиэлэргэ тарда сылдьаллар, от үлэтэ үмүрүйдэҕинэ ОДьКХ үлэһиттэрэ көмөҕө кэлиэхтэрэ. Олохтоохтор туох кыалларынан көмөлөһөллөр. Билэргит курдук, улахан үлэ барара эрэйиллэр — сэлиэнньэбит уһунунан аатырар, элбэх үрүйэ баар, халаан уутуттан куотан элбэх ыал хайа үрдүгэр уһаайбаланан саҥаттан дьиэлэрин туттубуттара… Онон, схемабыт уустук. Бу икки ыйдар улахан эппиэтинэстээх үлэни эрэйэллэр, — диэтэ баһылык.
Аныгы технология тугу кыайбатаҕа баарай диэҕи баҕарабыт, улууспутугар олорор-дьиэ хомунаалынай хаһаайыстыбата дьоһун үлэлээҕинэн биллэр, санаабыттара сатаныа диэн эрэниэҕиҥ.
Дойду Президенэ Владимир Путин быйыл саас Туһаайыы этиитигэр олоҕу-дьаһаҕы хааччыйыыга үлэлиир тэрилтэлэргэ 4,5 млрд. солк. көрбүтэ олус бэрт.
Людмила Аммосова, (хаартыскалар — нэһилиэк дьаһалтатын архыыбыттан).