Бу туһунан Александр Самсонов-Айыы Уолун ийэтэ Марфа Иннокентьевна иһитиннэрдэ.
Урут суруйбуппут курдук, сквер тутуута Дьокуускай куорат Октябрьскай уокуругар Хотугулуу-Илиҥҥи федеральнай университет сиригэр ыарахан ыарыыттан кылгас үйэлэммит саха эстрадатын чаҕылхай сулуһугар кини күн-күбэй ийэтин, ырыатын таптааччылар көҕүлээһиннэринэн саҕаламмыта. Бу ыччаттар 14-с куорпустарын аттыгар турар сири Марфа Самсонова тапталлаах уолун аатынан сквергэ диэн сүүрэн-көтөн көҥүл ылан араас амарах санаа кэнсиэртэринэн, уолун айар талааныгар сүгүрүйээччилэр үбүнэн көмөлөрүнэн туттарда.
Хомойуох иһин, харчы сквер сирин тупсаран оҥорууга, стела олбоҕор эрэ хапта. Сыана үрдүү турарынан быһаарыынан сирин бэлэмнии турарга санааттан манна элбэх үлэ барда.
Тутууну архитектор идэлээх уопуттаах прораб Александр Борисович Кан тус тэрилтэтэ бэдэрээттэһэн биир ый устатыгар дьаныһан туран үлэлээн түмүктээтилэр. Гитара ойуулаах стела турар олбоҕун, тула өттүн билиитэлэринэн тэлгэтэн, бордюрдаан, ыскаамыйаларынан ситэрэн биэрэн олус кичэллээхтик оҥордулар.
Сквери тутуу үлэтин түмүк-түүргэ Айыы Уолун ийэтэ Марфа Иннокентьевна дьүөгэлэрин, чугас дьонун, оҕотун эрэллээх доҕотторун, тутааччыларын кытары кэлэн сэмэйдик бэлиэтээн аастылар, сирин-уотун алҕаатылар, стелабыт хаһан эрэ тутуллар ини диэн ыра санааларын эттилэр. Саҕалааһын баар буолла! Бу үтүө дьыала олоххо киирэригэр Октябрьскай уокурук, университет салалталара, уоллаах дьон хаҥаластар, ол иһигэр улахан-ааннар, урбаанньыттарбыт, кыахтаах биир дойдулаахтарбыт, ыччаттар түмсэн көмөлөһүөхтэрэ,үчүгэйкээн дизайннаах стелабыт ( билигин барыллаан сыаната 3 мөл. солк.) анаммыт олбоҕор оннун булуо диэн эрэнэбит.
Уолчааммыт ийэтэ Марфа Самсонова сквер тутуутугар көмөлөспүт бар дьонугар, биир дойдулаахтарыгар улахан-ааннарга, ол иһигэр култуура үтүөлээх үлэһитигэр Галина Федороваҕа, «Сэргэчээн» оҕо ансаамбылын салайааччытыгар Римма Григорьеваҕа, «Дьүөгэлиилэр» үҥкүү бөлөҕөр, салайааччыларыгар Розалия Старостинаҕа, ону сэргэ музыка уонна фольклор түмэлин дириэктэригэр Мария Корниловаҕа, мелодистар ассоциацияларыгар, «Саха» НКИК үлэһиттэригэр о.д.а. үтүө санаалаах Сашатын ырыатын таптааччыларыгар махталын тириэрдэр.
Онон, марафон салҕанар, хаҥаластар, кыттыаҕыҥ, чаҕылхай сулуспут аата үйэлэргэ ааттана турдун! Отонноотоххо оҥоойук туолар, норуот күүһэ -көмүөл күүһэ!
Өссө төгүл үбү түмэргэ Марфа Самсонова аатыгар реквизити биэрэбит:
Банк получателя: Якутское отделение № 8603 ПАО Сбербанк
ИНН: 7707083893
КПП: 143502001
БИК: 049805609
Счет получателя: 40817810776000988162
Мобильный банк: 8-914-300-5924
Получатель: Марфа Иннокентьевна С. (мать Александра Самсонова-Айыы Уола).
Людмила МОРДОВСКАЯ.