Эркээни хочотун бастакы оҕо уһуйаана

Улууска үөрэхтээһин тэриллибитэ 150 сыла

Быйыл СӨ Үөрэх уонна билим министиэристибэтэ Оҕо саас сылын чэрчитинэн айымньылаахтык үлэлиир оҕо уһуйааннарын кэлэктииптэрин ортолоругар «Тыа сирин бастыҥ уһуйаана-2024» кэтэхтэн ыытыллар күрэҕи биллэрбитэ.

Бастыҥ уһуйааны үс хайысханан быһаардылар: федеральнай үөрэх бырагырааматын олоххо киллэрии, бастыҥ коррекционнай үлэни ыытыы, саха тылын сайыннарыы. Балаҕан ыйын 27-гэр, Иитээччи күнүгэр кыайыылаахтар билиннилэр. 18 муниципальнай тэриллииттэн уонна 1 куорат уокуругуттан барыта 30 сайаапка киирбит. Балартан саамай бастыҥнарынан 10 уһуйаан таҕыста. Олор истэригэр М.Е. Николаев аатынан Өктөмнөөҕү билим уонна үөрэхтээһин кииинин иһинэн үлэлиир «Мичээр» оҕо саада СӨ «Тыа сирин бастыҥ уһуйаана-2024» үрдүк наҕарааданы ылла.


Хаҥалас улууһун үөрэҕириитин бастакы хардыылара Өктөм нэһилиэгэр саҕаламмыта. Ол курдук, бастакы оҕо уһуйаана эмиэ манна аһыллыбыта.
Билигин бастыҥ «Мичээр» оҕо саадыгар Варвара Шевелева сэбиэдиссэйдиир.

Мин манна 2016 сыллаахтан үлэлиибин. Биһиэхэ 3 бөлөххө арахсан 52 оҕо сылдьар. Уопсайа 17 үлэһит үлэлиир. Биһиги уһуйааммыт өрөспүүбүлүкэтээҕиресурснай киин буолбута. Онон оҕо талаанын, дьоҕурун кыра сааһыттан арыйыахтаахпыт. Манна анаан музыкаҕа, саахымакка, араас тыллары үөрэтиигэ, чөл олоххо тардыһарга уһуйабыт. Үлэһиттэрим бары эдэр эрчимнээх буолан саҥа сүүрээннэрии киллэрэргэ бэлэмнэр.

Чапаев сэлиэнньэтин оҕо саада өр кэмнэргэ эргэ дьиэҕэ үлэлээбитэ. 2010 сыллаахха саҥа дьиэҕэ көспүппүт, ол да буоллар каркаснай тутуу буолан ирдэбилгэ эппиэттээбэт буолан турар. Онон инникитин таас уһуйаан тутулларын күүтэбит. Нэһилиэк кэҥээн иһэр, оҕо элбэх, онон киэҥ-куоҥ саҥа дьиэҕэ киирэрбит тоҕоостоох, — диэн Варвара Шевелева үлэтин-хамнаһын туһунан сэргээтэ.

Татьяна Владимирова.