Сэтинньи 13 күнэ дойдубут, Сахабыт сирин өрөспүүбүлүкэтин Судаарыстыбаннаһа бөҕөргүүрүгэр, социальнай-экономическай сайдыытыгар сүдү кылааты киллэрбит Бастакы Президеммит Михаил Николаев төрөөбүтэ 87 сылынан Покровскайга быйыл күһүн туруоруллубут пааматынньыгын аттыгар хаҥаластар, ыалдьыттар муһуннулар.
Сахатын норуотун дьылҕатыгар ананан төрөөн дойдуга уларыта тутуу саамай тыҥаһааһыннаах кэмнэригэр хомпоруун хотойдуу инникини өтө көрөн муударай өйүнэн, модун санаатын кыаҕынан норуотун сайдар суолун тускуллаан, сүүһүнэн сылларга оҥоһуллубатаҕы оҥорбут биир дойдулаахпытыгар сүгүрүйүү бэлиэ түгэнигэр Хаҥалас баһылыга Олег Иринееев, СӨ Судаарыстыбаннай Мунньаҕын бэрэссэдээтэлин солбуйааччы, » Биир ньыгыл Россия» политическай партия регионнааҕы политсоветын президиумун чилиэнэ Юрий Николаев, СӨ култуураҕа уонна духуобунай сайдыыга миниистирэ А.И. Ноев Михаил Ефимович кэскиллээх үлэтин, Сахабыт сирин аар-саарга ааттаппытын, олохпут оҥкулун уурбутун бэлиэтээн саха дьонун махталын тириэртилэр.
Мустубут дьон саха саарыныгар Михаил Николаевка сүгүрүйэн пааматынньыгар сибэкки дьөрбөтүн уурдулар. Биир дойдулаахпыт пааматынньыгар сүгүрүйүү сиэрэ-туома аны сыллата ыытыллара үтүө үгэскэ кубулуйуо.
Людмила Аммосова.