Оҕолорбут суруйаллар
Соторутааҕыта биһиги Уһук Илин Лесозаводск куоратыгар баран волейболга күрэхтэһэн кэллибит. Бу ыраах сиргэ поеһынан айаннаабыппыт. Уопсайа икки нэдиэлэ сырыттыбыт, биир нэдиэлэбит айаммытыгар барда. Аара Хабаровскай куоракка күүлэйдээн ааспыппыт.
Барыта биэс хамаанданы кытта күрэхтэстибит. Биһиги хамаандабытыгар Булгунньахтаах оскуолатыттан 4 үөрэнээччи, Мохсоҕоллоохтон 1 уонна 1-кы Дьөппөн орто оскуолатыттан мин, Милана Скрябина, Лера Сыромятникова уонна Элина Теплоухова кытынныбыт. Бөлөхпүтүн Булгунньахтаах орто оскуолатын тренерэ Егорова Екатерина Егоровна салайан илдьэ сырытта.
Сахабыт сириттэн 4 хамаанда баара: Мэҥэ Хаҥалас уонна Нам кыргыттара. Бары билсэн, бииргэ айаннаан, доҕордоһон сырыттыбыт. Бу күрэхтэһиигэ өссө Амма улууһуттан уолаттар хамаандалара кытынна. Биһиги уопсай түмүккэ 12-с миэстэ буоллубут. Ол эрээри санаабытын түһэрбэккэ сири-дойдуну көрөн-истэн, уопут атастаһан кэллибит. Бу сырыыттан олус диэн астынныбыт, барбыппытын кэмсиммэтибит. Учууталларбытыгар, дьүөгэлэрбитигэр, дьоммутугар уонна бииргэ төрөөбүттэрбитигэр кыракый Саҥа Дьыллааҕы сувенир кэһиилээх кэллибит. Кинилэр онтон үөрэн махтаммыттара олус үчүгэй этэ!
Санаайа Очиржапова, П.С. Скрябин аатынан 1-кы Дьөппөн орто оскуолатын 7 кылааһын үөрэнээччитэ. Медиакиин.