Култуура сонуна
Ахсынньы 24 күнүгэр Булгунньахтаах сэлиэнньэтигэр Арчы дьиэтигэр ыраах Дьааҥы сириттэн СӨ култууратын туйгуна, олоҥхоһут, төрөөбүт дойдутун фольклорун чинчийээччи, тарҕатааччы Саргылана Семеновна Слепцова – Хатан Кылааны кытта көрсүһүү дьоро киэһэтэ буолан ааста. Бу Дьааҥы улууһун киин бибилэтиэкэтин кыраайы үөрэтэр салаатын » Олоҥхо – олох оҥкула» – бырайыак чэрчитинэн, өрөспүүбүлэкэбит иһинэн ыытыллар киэҥ хабааннаах бырайыага буолар.
Бу күн Саргылана Слепцова-Хатан Кылаан суруйбут “Күн Эрилиэс бухатыыр” олонхотун быһа тардыыны, Дьааҥы улууһун фольклорун иһиттибит. Биһиги, көрөөччүлэр, олус сэҥээрдибит — хаһан да истибэтэх мурун, хабарҕа, таҥалай ырыаларын толорбутун. Элбэх ыйытыы киирдэ. Олохтоох бибилэтиэкэҕэ ыалдьыппыт култуура киинигэр “Күн Эрилиэс бухатыыр” диэн бэйэтин кинигэтин бэлэх туттарда. Түмүгэр дьоро киэһээни «һээдьэ» үҥкүүтүнэн түмүктээтибит.
Маннык тэрээһиннэр өссө да элбии турдуннар. Билиҥҥи уларыйа турар хабааннаах олоххо олус улахан суолталаах тэрээһин эбит диэн сыаналаатыбыт, төрөөбүт тылбытын, сиэрбитин-туоммутун тутан хааллахпытына эрэ саханы саха дэтэ турар буоллахпыт. Саргылана Слепцоваҕа, улуус бибилэтиэкэтин кэлэктиибигэр барҕа махталбытын тириэрдэбит.
Анисия Дьяконова, олохтоох бибилэтиэкэ салайааччыта.