Тохсунньу 22 күнүгэр суруйааччы С.П. Ефремов төрөөбүтэ 120 сылынан тэриллибит декаданы түмүктүүр тэрээһин Покровскайга Г.В. Ксенофонтов аатынан түмүлгэ буолан ааста.
Элбэх киһи кытынна. Бу күннэргэ ыытыллыбыт көрсүһүүлэртэн, ахтыы биэчэрдэриттэн, оскуолаларга аһаҕас уруоктартан, о.д.а. тэрээһиннэртэн мустубут дьон видео-роликтары көрдүбүт.
Түмэл үлэһитэ Елена Скрябина, Булгунньахтаахтан педагогическай үлэ бэтэрээнэ, үөрэҕирии туйгуна Евдокия Егорова, улуус дьаһалтатыттан Борис Протодьяконов, суруйааччы кыыһа Антонина Дьяконова, суруналыыс Людмила Аммосова Степан Ефремов туһунан истиҥ тыллары эттилэр.
Бу күн «Хаҥалас» («Хангалас») хаһыаттар редакциялара, бастакы сүһүөх суруналыыстар тэрилтэлэрэ, I-Малдьаҕар олохтоох дьаһалта, улуустааҕы дьаһалта култуураҕа уонна духуобунас сайдыытыгар управлениетын суруналыыстарга уонна общественнай кэрэспэдьиэннэргэ култуура олоҕун, чөл олоҕу сырдатыыга куонкуруһа түмүктэннэ. Икки сыл түмүгүнэн нууччалыы тыллаах хаһыаппытыгар култуура олоҕуттан, ол иһигэр СӨ Ил Дарханын А.С. Николаев түөрт оройуоҥҥа Саха сиригэр биллэриллибит дьаам култууратын биэс сылларынан дьоһун суруйуулары бэчээттэппит Бэстээх оскуолатын нуучча тылыгар уонна литературатыгар учуутала Елена Семеновна Сергеева бастыҥынан ааттанан диплому уонна бириэмийэни тутта. Лауреакка Степан Ефремов оҕолорун ааттарыттан Антонина Дьяконова үрүҥ көмүс бэлиэни бэлэхтээтэ. Эҕэрдэлиибит!
Үөрүүлээх тэрээһиҥҥэ суруйааччы С.П. Ефремов үтүө аатын үйэтитиигэ утумнаах дьоһун кылааттарын бэлиэтээн улуус баһылыгын аатыттан Борис Протодьяконов үлэ бэтэрээннэригэр Евдокия Егороваҕа, Афанасий Дьяконовка, Александр Тимофеевка Махтал суруктары туттарда.
Декаданы түмүктүүр тэрээһиҥҥэ оскуола оҕолоро кытыннылар, Таня Харитонова суруйааччы айымньытыттан быһа тардыыны аахта. Түмэл үлэһиттэрэ драматург айар үлэтин, олоҕун сырдатар быыстапканы тэрийдилэр.
Декада түмүктэннэ эрээри, суруйааччы 120 сылынан тэрээһиннэр салҕаналлар.
Людмила Мордовская.