Сэрии сылларын оҕолоро
Кыайыы 75 сылыгар анаан тыыл, үлэ ветераннара, аҕам стахановец Федоров Ефим Артамонович, Федорова Анна Григорьевна сэрии кэминээҕи олохторун санаан ааһыам.
Аҕам аҥаар хараҕа суох буолан сэриигэ ыҥырыллыбатаҕа. Холкуос туох баар ыарахан үлэтигэр үлэлээбитэ, АллаахҮүҥҥэ таһаҕас таһыытыгар сылдьыбыта. Ийэм мас кэрдиитигэр, от тиэйиитигэр үлэлээбит.
Сэрии ыарахан кэмнэрин кэпсииллэрэ. Хаарыан дьоннорбутун сэрии сиэтэлээн үлэһит илии олох тиийбэтэ. От үлэтэ саҕаламмыт. Аҕам дэриэбинэттэн икки көстөөх сиргэ 10-14 саастаах оҕолору хомуйан оттуу барбыттар. Окко ынахтарын ыан ааһаары илдьэ киллэрбиттэр.
Ийэм барахсан бэс ыйын 6 чыыһылатыгар миигин төрөтөн баран биир ыйдаах килиэп астааччыннан, окко көмөлөһөөччүнэн киирбит. Аҕам көлөлөрүн, оттуур сэптэрин тиэйэн отчут уолаттарынаан барбыттар. Ийэм кыһыл оҕотун көтөхпүтүнэн ынахтарын, ньирэйдэрин үүрэн тиийбит, ынахтара куоппуттар, эккирэтээри, миигин үөт төрдүгэр хаалларан баран, нэһиилэ булбуттар үһү. Кытаанах олох буолбатах дуо? Сайыны быһа өрбөх суулаах оҕону чабычахха уган баран ходуһаҕа илдьэ сылдьыбыттар. Киэһэ аайы отчут уолаттар мэһэмээн ыйааһыҥҥа ыйыы-ыйыы миигиннэн саатыыллар үһү. Эһиилигэр эмиэ окко сылдьыбыппын, онно сылдьан сииккэ тымныйан кутургуйа тахсан өлө сыспыппын. Аҕам саха быһаҕын уокка сиэтэн баран хайа сотон эмтээбит.
Чэ, ити курдук ийэлээх аҕам сэрии кыһалҕалаах олоҕун этэҥҥэ тулуйан аҕыс оҕону төрөтөн, үс тулаайах оҕолору иитэн киһи оҥортоон улахан дьиэ кэргэни, аймаҕы тутан олорбуттара.
Аҕам өҥ сааһыгар дылы күүстээх үлэҕэ, тутууга үлэлээн Москваҕа ВДНХ-ҕа сылдьыбыта. Бригадатын уолаттара убаастаан киэҥ-куоҥ дьиэ тутан биэрбиттэрэ.
Ийэлээх аҕабыт олорон ааспыт ыарахан да, үөрүүлээх да түгэннэрин оҕолорбутугар, сиэннэрбитигэр кэрэ кэпсээн оҥостобут.
Людмила Ефимовна Аммосова, педагогическай үлэ ветерана, Тиит Арыы бочуоттаах олохтооҕо.
(«Сэрии кэмин оҕолоро» кинигэттэн, 2021 с.)
Редакцияттан: Л.Е. Аммосова Саха өрөспүүбүлүкэтин, Хаҥалас улууһун социальнай-экономическай сайдыытыгар кылаатын иһин бэлиэлэрдээх, Саха АССР Үрдүкү Сэбиэтин, СӨ Судаарыстыбаннай Мунньаҕын (Ил Түмэн), СӨ үөрэҕириитин министиэристибэлэрин бочуотунай грамоталарынан о.д.а. наҕараадаламмыт, өр сыл Тиит Арыыга оҕо уһуйаанын, 1987-1996 сылларга нэһилиэгин салайбыт, улуус общественнай олоҕор көхтөөхтүк кыттар, ытыктанар киһи этэ.