1941 сыл. «Советтар знамялара» хаһыаппыт суруйара
1941 сыл. Бэс ыйын 25 күнүнээҕи улууспут хаһыатын нүөмэригэр аан бастаан “ССРС совнаркомун председателин солб. уонна Атын дойдуларынааҕы дьыалалар народнай комиссара т.Вячеслав Михайлович Молотов бэс ыйын 22 күнүнээҕи радионан этиитэ” диэн улахан иһитиннэриинэн Аҕа дойду Улуу сэриитин туһунан суруйуулар бэчээттэнэн барбыттара.
Мантан кылгатан хайдах суруллубутунан биэрэбин:“Сарсыарда 4 чааска Советскай Союзка ханнык да сылтаҕа суох, сэбилэниини биллэриитэ суох Германия сэриилэрэ дойдубутугар саба түстүлэр. Биһиги границаларбытын элбэх сирдэринэн атаакалаатылар уонна бэйэлэрин самолеттарынан биһиги куораттарбытын Житомиры, Киевы, Севастополы, Каунаһы уонна сорох атын куораттары буомбалааһыҥҥа тигиһиннэрдилэр. Маныахаҕа 200-тэн тахса киһи өллө уонна бааһырда. Өстөөх самолеттарын налеттааһыннара уонна артиллериянан ытыалааһын румынскай уонна финляндскай территорияларынан эмиэ оҥоһулунна.
….Биһиги дьыалабыт кырдьыктаах дьыала. Өстөөх үлтүрүтүллүөҕэ. Кыайыы биһиэнэ буолуо!”
Бу уһун, быһыыны-майгыны сиһилии иһитиннэриилээх тыл этиитин хаһыаппыт кэрэспэдьиэннэрэ бэрт ыксалынан тылбаастаан биэрбиттэрэ көстөр. Ити кэнниттэн хас хаһыат аайы Совинформбюро иһитиннэриилэрэ, миэстэтиттэн олохтоохтор саҥа балаһыанньаҕа хайдах дьаһанан үлэлээн-хамсаан эрэллэрэ тахсан барбыттара. Оччоллорго “Советтар знамялара” хаһыат редакторынан Иван Иванович Аллахинов үлэлиирэ.
Колхозтартан иһитиннэриилэртэн
II-Маалтааны. Папанин аатынан колхоз колхозтаахтара народтар улуус сирдьиттэрэ таб. Сталин радионан этиитин сүҥкэн патриотическай өрө көтөҕүллүүнэн көрүстүлэр.
Колхозтаахтар бары биир санаанан ылыллыбыт резолюцияларыгар от ыйын устатыгар сорудаҕы бүтэрэргэ, 3 от охсор массыыналар 2 звенонан төгүрүк сууккаҕа тохтобула суох үлэлииллэрин олохтуурга ылыннылар. Папанин аатынан колхоз от ыйын 5 күнүгэр диэри 48,8 гектар сири охсон МХО уонна 10 киһилээх ГТО группатын тэрийэн үөрэтээри саҕалаан эрэллэр.
И. Артюшкин.
10.06.1942 сыл.
Кыргыттар тракторга уонна комбайнҥа
Оройуоннааҕы комсомольскай тэрилтэ трактористар уонна комбайнердар курстарын аһарга дьулуһан туран тракторист буолар баҕалаах кыргыттары кытары кэпсэтиилэр оҥортоото. Ол түмүгэр 22 кыргыттар Массыына-тракторнай станцияҕа баран үөрэнэр буоллулар.
“СЗ” корр.
13.06.1941 сыл.
Мастерскойдар аһылыннылар
Олохтоох промышленноһы сайыннаран туран нэһилиэк наадыйыытын толуйар наадаттан икки сельполарга мас оҥоһуктарын мастерскойдара арылынна.
Иһит сельпотун мастерскойа хайы-үйэ 10 остуоллары, 25 олох мастары, 2 чемоданнары, 30 буочукалары уонна 50 дугалары оҥорон таһааран атыылааһыны тэрийэ турар. Бу мастерской оҥоһуктары 2575 солк. суумаҕа туттарда.
Н. Архипов.
20.06.1941 сыл.
Трактортан комбайнҥа олоруом
Мин Массыына-трактор станциятыгар 2 ыйга тракторга үөрэнэн курсу үчүгэй сыананан бүтэрбитим.
Кууруспун бүтэрээт бэйэм Карл Маркс аатынан колхозпар баран сааскы ыһыы үлэтигэр “ХТЗ” тракторга үлэлээбитим. Онно бэйэм симиэнэбэр 11 хонукка 52 гектар сири культивациялаан, 8,65 гектар сири ыһан сааскы үлэм былааны 121% толорбутум. Сталин ыҥырыытын истэн баран комбайнер специальноһын баһылыырга бэйэм санаабын МТС дирекциятыгар биллэрбитим. Онон от ыйын 11 күнүттэн комбайнердар курстарыгар үөрэнэн эрэбин.
М.Гаврильева, Карл Маркс аатынан колхоз трактористката.
20.06.1941 сыл.
Кыһыл армияҕа ылыҥ диибит
Биһиги кирпииччэ заводугар комсомольскай-ыччат биригээдэтигэр үлэлиибит.
Призыв буолуутун туһунан САССР байыаннай комиссара таһаарбыт прикаһын улахан үөрүүнэн көрүстүбүт. Биһиги төрдүөн 1921-1922 с.т. ыччаттарбыт. Заводка үлэбит нуорматын 130 % тиэрдэ толордубут.
Призывной комиссияттан биһигини Кыһыл Армия кэккэтигэр ылалларыгар көрдөһөбүт. Фашистары хампы сынньарга бэлэммит.
Г. Дмитриев, С. Павлов, И. Филиппов, Д. Ливерьев.
30.06.1941 сыл.
Иһитиннэриилэри Людмила Мордовская бэлэмнээтэ.